Nú í dag lauk Norðurlandamóti ungmenna U23 í Keiluhöllinni Egilshöll. Leikið var til úrslita í svokallaðri Masters keppni en þar áttust við 8 efstu piltar og stúlkur þar sem keppt er maður á mann og fást aukastig fyrir sigur í leik. Svíar rökuðu inn gullverðlaunum á mótinu, unnu einstaklingskeppnina hjá báðum kynjum, tvímenninginn og liðakeppnina auk þess sem að fá gullverðlaunin fyrir samanlagðan árangur í öllum keppnum. Það var þó Marjaana Hytönen frá Finnlandi sem vann Masterskeppni stúlkna og kom í veg fyrir að Svíar færu heim með öll gullverðlaunin en William Svensson frá Svíþjóð var án efa keppandi mótsins en hann vann piltakeppnina í Mastersflokkum auk þess að taka All event-, einstaklings- og tvímenningskeppnina með félaga sínum Robin Skans.

Mótinu lýkur svo formlega í kvöld með lokahófi en strax í fyrramálið halda erlendu gestirnir heim á leið.

Keilusamband Íslands þakkar ÍTR fyrir dyggan stuðning við mótið. Sem og þökkum við Keiluhöllinni fyrir að hýsa keppnina.

Degi tvö á Norðurlandamóti ungmenna U23 er lokið en í dag voru seinni leikirnir í liðakeppni leiknir og seinni part dagsins fór fram keppni í tvímenningi. Íslensku stúlkurnar urðu í 3. sæti liðakeppninnar.

Svíar halda áfram að raða inn gullverðlaunum og sigruðu allar keppnir dagsins. Piltalið þeirra seig fram úr Finnum í dag en Finnar voru í forystu eftir fyrri daginn. Það voru síðan Norðmenn sem urðu í 3. sæti en íslensku piltarnir urðu í 4. og neðsta sæti. Mikil barátta varð hjá stúlkunum milli Svía og Finna og munaði aðeins 56 pinnum á þeim í lokin 4.685, 195 í meðaltal, gegn 4.629 193 í meðaltal. Finnsku stúlkurnar voru í efsta sæti eftir 4 leiki af 6 en þær sænsku náðu glæsilegum leik í 5. leiknum og héldu svo forystu í síðasta leiknum.

Í tvímenningi voru það þær sænsku Nora Johansson og Emma Hlttunen sem sigruðu með 199 í meðaltal en það munaði nú ekki nema 19 pinnum á þeim og finnsku stúlkunum Vilma Salo og MArjaana Hytönen sem voru með 197 í meðaltal.

Hjá piltunum voru það þeir Willliam Svensson og Robin Skans sem unnu tvímenninginn með 223 í meðaltal og sigruðu þeir nokkuð örugglega.

Í fyrramálið kl. 10 hefst keppni 8 meðaltalshæstu stúlkna í svo kallaðri Masters keppni. Eftir hádegi verður síðan komið að 8 meðaltalshæstu piltunum að keppa. Mótinu lýkur að því loknu og halda keppendur heim á leið á sunnudaginn kemur.

Streymt er frá mótinu á Fésbókarsíðu Keilusambandsins. Úrslit og stöðu má sjá á vefsíðunni http://bowlingresults.info/nyc/2019/

Í dag var fyrsti keppnisdagurinn á Norðurlandamóti ungmenna en keppnin fer fram hér í Keiluhöllinni Egilshöll. Keppt var í einstaklingskeppni og unnu Svíar tvöfalt hjá piltum og stúlkum. Það voru þau William Svensson með 234,8 í meðaltal í 6 leikjum og Emma Halttunen með 206,8 í meðaltal sem nældu sér í gullið. Besta árangri íslensku ungmennunum náði Guðbjörg Harpa Sigurðardóttir Þór en hún endaði í 5. sæti í stúlknaflokki með 186,7 í meðaltal.

Í örðu sæti í piltaflokki í einstaklingskeppninni í dag varð Alexander Beck frá Noregi og Teemu Putkisto frá Finnlandi varð í 3. sæti. Best íslensku pilta spilaði Jóhann Ársæll Atlason ÍA en hann varð í 12. sæti með 203,2 í meðaltal. Í öðru sæti í kvennaflokki varð Marjaana Hytönen frá Finnlandi og landa hennar Peppi Konsteri varð í 3. sæti.

Eftir hádegið fóru svo fram fyrri 3 leikirnir í liðakeppninni. Finnar leiða keppnina en stúlkurnar eru í efsta sæti með 189 í meðaltal en finnsku piltarnir eru með 232,6 í meðaltal.

Keppnin heldur áfram í fyrramálið en þá verða leiknir seinni 3 leikir í liðakeppninni en eftir hádegið verður komið að tvímenningi.

Streymt er frá mótinu á Fésbókarsíðu Keilusambandsins. Úrslit og stöðu má sjá á vefsíðunni http://bowlingresults.info/nyc/2019/

Í kvöld hófst Norðurlandamót ungmenna (U23) í Keiluhöllinni Egilshöll. Mótið, sem er haldið annað hvert ár, er samstarfsverkefni Íslands, Finnland, Noregs og Svíþjóðar og skiptast löndin á að halda keppnina. Mótið stendur fram á laugardag og er keppt í ýmsum flokkum bæði pilta og stúlkna. Í fyrramálið hefst einstaklingskeppnin en þátttakendur leika 6 leikja seríu, ekki er um sérstök úrslitakeppni að ræða fyrr en á laugardag en þá er keppni í masters flokki en þar keppa 8 efstu stúlkurnar og 8 efstu piltarnir sigurvegara mótsins. Síðan verður keppt í liðakeppni en alls senda liðin almennt 4 pilta og 4 stúlkur til leiks.

Hægt er að sjá dagskrá mótsins á vef þess www.nyc2019.is – Stefnt er að því að streyma frá mótinu á Fésbókarsíðu Keilusambandsins.

Meðfylgjandi myndir eru frá setningarathöfn í kvöld. Þar bauð Jóhann Ágúst Jóhannsson formaður Keilusambandsins þátttakendur velkomna. Umrædd lönd eru sammála um að þessi viðburður sé einn sá mikilvægasti í starfsemi landanna því hann eflir tengsl þjóðanna og þarna fá ungmennin kjörið tækifæri til að kynnast öðrum keilurum frá nágrannalöndum og byggja upp vinatengsl sem hæglega geta varið í áratugi.

Lið Íslands skipa þau:

• Alexander Halldórsson KFR
• Aron Fannar Benteinsson KFR
• Hlynur Örn Ómarsson ÍR
• Jóhann Ársæll Atlason ÍA
• Eyrún Ingadóttir KFR
• Guðbjörg Harpa Sigurðardóttir Þór
• Hafdís Eva Laufdal Pétursdóttir ÍR
• Jóhanna Ósk Guðjónsdóttir ÍR

Þjálfari er Guðmundur Sigurðsson ÍA og honum til aðstoðar eru Jónína Magnúsdóttir ÍA og Skúli Freyr Sigurðsson KFR

Mótið hér á landi nýtur góðs stuðnings ÍTR og Keiluhallarinnar. Þakkar Keilusambandið þeim af heilum hug fyrir.