Dagný Edda Þórisdóttir KFR og Hafþór Harðarson ÍR eru keilarar ársins 2020

Jóhann Ágúst Jóhannsson
Árangur keilara, Innlend mót, ÍSÍ, Uncategorized

Stjórn KLÍ hefur útnefnt þau Dagnýju Eddu Þórisdóttur úr Keilufélagi Reykjavíkur og Hafþór Harðarson úr ÍR sem keilara ársins 2020. Er þetta í 6. sinn sem Dagný hlýtur þessa útnefningu og í 7. sinn hjá Hafþóri.

Þrátt fyrir að Covid hafi leikið íþróttaiðkun ansi grátt á árinu ber þó að fagna og verðlauna fyrir það sem gert hefur verið i ár.

Dagný Edda var til dæmis með besta meðaltal allra kvennkeilara í deildarkeppninni á árinu og varð einnig stigameistari tímabilsins 2019 til 2020. Dagný Edda fór fyrir liði sínu KFR Valkyrjum og sigraði Bikarkeppni KLÍ 2020 og urðu þær einnig Deildarmeistarar 2020. Dagný Edda varð einnig Reykjavíkurmeistari kvenna nú á haustmánuðum.

Hafþór Harðarson vann einnig bikartitilinn 2020 með liði sínu ÍR PLS og urðu þeir einnig deildarmeistarar 2020. Hápunktur Hafþórs varð án efa að sigra sterkasta mót Reykjavíkurleikanna sem haldið hefur verið á Íslandi til þess. Lagði hann þar í úrslitum Danielle McEwan sem er atvinnukeilari frá Bandaríkjunum.

Íslandsmóti einstaklinga 2020 aflýst

Jóhann Ágúst Jóhannsson
Auglýsingar, Innlend mót, Íslandsmót einstaklinga, Mótaauglýsingar, Mótanefnd, Skrifstofa KLÍ, Uncategorized

Í ljósi ákvæða í reglugerð Heilbrigðisráðherra um samkomutakmarkanir vegna farsóttar um bann við keppnisíþróttum til 12. janúar 2021 er ljóst að Íslandsmóti einstaklinga 2020 er aflýst. Mótið átti upprunalega að fara fram í mars á þessu ári en hefur verið frestað ítrekað vegna samkomutakmarkanna. Nú er ljóst að tækifærin til að halda mótið í ár eru farin og í raun er stutt í að Íslandsmót einstaklinga 2021 verði.

Þórarinn Már Þorbjörnsson tekur við sem Framkvæmda- og íþróttastjóri KLÍ

Jóhann Ágúst Jóhannsson
Skrifstofa KLÍ, Uncategorized

Eins og fram hefur komið ákvað stjórn KLÍ að sameina starfsgildi sambandsins í eitt. Megin markmið þess er að fullnýta starfskrafta viðkomandi þannig að sambandið hafi aðila sem sinnir Keilusambandinu að fullu. Stjórn auglýsti stöðuna í byrjun október og bárust nokkrar umsóknir. Eftir yfirferð var ákveðið að ræða við Þórarinn og tókust samningar milli aðila rétt fyrir mánaðarmótin.

Þórarinn tekur við starfinu ekki síðar en 1. mars 2021.

Kristján Ó Davíðsson sem gengt hefur starfi Íþróttastjóra sinnir því áfram í það minnsta til áramóta. Vill stjórn KLÍ koma á framfæri sérstökum þökkum til Kristjáns fyrir hans starf í þágu sambandsins.

Tilkynning vegna mótahalds 2020

Jóhann Ágúst Jóhannsson
Auglýsingar, Innlend mót, Mótanefnd, Uncategorized

Stjórn KLÍ ákvað á stjórnarfundi í gær að aflýsa Íslandsmótum para og tvímennings 2020 sem og að fresta öllum deildarviðureignum fram yfir áramót. Er það gert vegna framlengingar á reglugerð um samkomutakmarkanir vegna Covid-19 til 9. desember og upplýsinga sem fram hafa komið um tillögur Sóttvarnarlæknis það sem til stóð að létta á gagnvart íþróttum en þar kom fram að keppni væri óheimil áfram.

Íslandsmóti einstaklinga 2020 er ekki aflýst um sinn þótt ljóst sé að tækifærin til að halda mótið fara minnkandi með hverjum deginum.

Vert er að taka fram að sérsambönd innan ÍSÍ ásamt forystu ÍSÍ hafa verið í miklum samræðum við yfirvöld til að reyna að koma á íþróttastarfi á landinu. Veiran heldur þó áfram að hafa mikil áhrif á daglegt líf okkar og KLÍ sem og önnur sérsambönd fara í einu og öllu eftir þeim reglum og tilmælum sem gefin eru út hverju sinni.

Frekari ákvarðanir verða teknar af stjórn KLÍ þegar tækifæri gefst til.

Uppfærðar sóttvarnarreglur og staðan framundan

Jóhann Ágúst Jóhannsson
Innlend mót, ÍSÍ, Mótanefnd, Skrifstofa KLÍ, Uncategorized

Í dag tekur gildi ný reglugerð um samkomutakmarkanir vegna Covid farsóttar. Nú má hefja æfingar barna undir 16 ára aldri en áfram er öll keppni bönnuð. Félög geta því hafið að nýju æfingar með þeim takmörkunum sem reglugerðin setur og að því sögðu þá er búið að uppfæra sóttvarnarreglur KLÍ sem sjá má hér.

En hver er staðan framundan með keppni í keilu?

Eins og reglugerðin segir til um þá er keppnisbann á meðan reglugerðin er í gildi en hún er til 1. desember. Óljóst er hvað tekur við eftir núverandi reglu svo það má í besta falli búast við að komast í gang í desember en ætli raunsæið segi okkur ekki frekar það að við förum í gang á nýju ári.

Með keppni innan okkar raða þá hefur stjórn KLÍ, framkvæmdastjóri og mótanefnd rætt sín á milli hvernig best sé að ná upp dagskrá þegar við komumst í gang. Sú leið sem er í umræðunni er að spila örar þegar við komumst í gang og það þýðir að það geta verið deildarleikir tvisvar í viku í einhvern tíma þar til við erum komin á rétt ról með deildarkeppnir.

Ástæða þess er einnig að samkvæmt sóttvarnarreglum sem voru í gildi á meðan keppni stóð yfir og búast má við sambærilegum reglum var ákvæði um að ekki væru fleiri en 50 manns í sama rými. Af þeim sökum er ekki hægt að spila á öllum brautum á einu kvöldi. Keiluhöllin hefur veitt okkur leifi til að spila nokkra leiki á miðvikudagskvöldum þar sem Utandeildin er ekki í gangi sökum aðstæðna. Búast má því við þeirri ákvörðun að nokkrir leikir verði settir á miðvikudagskvöld og verða lið því að fylgjast vel með dagskrá þegar keppni kemst í gang aftur. Einnig má búast við því að leikir verði settir á um helgar.

Margir fundir hafa verið haldnir á vegum ÍSÍ með héraðs- og sérsamböndum ásamt fulltrúum almannavarnarnefndar höfuðborgarsvæðisins, sóttvarnarlækni og forsvarsfólki íþróttaráða sveitarfélaga. Mikil krafa er komin frá sérsamböndum um að leifa í það minnsta afrekshópum að æfa enda mjög augljóst að afreksmál eru að dragast aftur úr í öllum íþróttagreinum þegar aðilar geta ekki æft. Allir vilja komast sem fyrst í gang en allir eru sammála um að íþróttahreyfingin gangi í takt og sér ÍSÍ þá um forystuhlutverkið í þeim málum.

En núna þegar æfingar barna fara að komast í gang og á komandi tímum önnur starfsemi hvetjum við alla til að huga vel að sóttvörnum sínum og hjálpast að við að halda okkar umhverfi öruggu.

Keppnishaldi frestað til 3. nóvember

Jóhann Ágúst Jóhannsson
Auglýsingar, Innlend mót, ÍSÍ, Mótanefnd, Skrifstofa KLÍ, Uncategorized

Stjórn KLÍ ákvað á fundi í gærkvöld að framlengja frestun á öllu mótahaldi til 3. nóvember en í gær var gefin út ný reglugerð Heilbrigðisráðuneytis um takmörkun á samkomum vegna farsóttar. Vegna hennar og skv. tilmælum frá Almannavörnum höfuðborgarsvæðisins um lokun íþróttamannvirkja.

Stjórn ákvað líka að reyna eftir fremsta megni að koma þeim mótum á sem hefur verið frestað hingað til og t.d. stefna að því að halda Íslandsmót einstaklinga dagana 14. til 17. nóvember. Ljóst er að riðla þarf til dagskrá svo að það gangi upp. Keilurum er bent á að fylgjast vel með dagskrá sem og fréttum á vef KLÍ því það er deginum ljósara að við þurfum að bregðast hratt við til að geta haldið mótin.

Vert er að benda á að þótt skipulagt starf sérsambands og aðildarfélaga á höfuðborgarsvæðinu sé í bið þá er Keiluhöllin Egilshöll opin en starfar skv. ströngum fyrirmælum reglugerðarinnar með mjög takmarkaðan fjölda í húsinu.

Tilkynning og reglugerð ráðherra um takmörkun á samkomum.

Tilkynning Almannavarnarnefndar höfuðborgarsvæðis um lokun íþróttamannvirkja.

 

Breytingar framundan á starfsmannahaldi KLÍ

Jóhann Ágúst Jóhannsson
Auglýsingar, Skrifstofa KLÍ, Uncategorized

Stjórn KLÍ hefur undanfarið haft til skoðunar og nú ákveðið að sameina störf íþróttastjóra og framkvæmdastjóra sambandsins. Ein megin ástæða þeirra breytinga er að fá meiri nýtni úr einum starfsmanni í fullu starfi heldur en tveim í hlutastörfum. Á liðnu ársþingi var samþykkt fjárhagsáætlun sem geri ráð fyrir þessari breytingu.

Af þeim sökum hefur stjórn KLÍ sagt upp ráðningarsamningum við núverandi starfsmenn frá og með s.l. mánaðarmótum með starfslokum 31. desember komandi. Að sama skapi hefur verið opnað á umsóknir fyrir sameinað starf og er umsóknarfrestur til loka október 2020. Áhugasömum er bent á að senda umsókn á [email protected]. Vonast er til að geta tekið ákvörðum um framhaldið fljótlega í nóvember.

Starfslýsing KLÍ 2021.

Æfingum og keppnum innan vébanda KLÍ frestað um tvær vikur

Jóhann Ágúst Jóhannsson
Innlend mót, Skrifstofa KLÍ, Uncategorized

Samkvæmt tilmælum frá Sóttvarnarlækni og almannavarnateyminu sem fram komu á upplýsingafundi nú áðan er mælst til þess að íþróttaæfingum og keppnum sé frestað um í það minnsta tvær vikur. KLÍ hefur því ákveðið að verða við þeim tilmælum og fresta allri starfsemi innan vébanda þess á höfuðborgarsvæðinu strax frá og með þriðjudeginum 6. október 2020. Keilufélag Akranes tekur sjálfstæða ákvörðun um æfingar á sínu svæði.

Iðkendur eru hvattir til að fylgjast vel með fréttum frá KLÍ um hvenær starfsemi fer í gang aftur. Einnig eru allir hvattir til að fara varlega, sinna sínum sóttvarnaraðgerðum og huga að eigin heilsu.

Sérstök aðgát í íþróttahúsum/mannvirkjum

Jóhann Ágúst Jóhannsson
ÍSÍ, Uncategorized, Unglinganefnd, Ungmennastarf

Keilusambandinu barst rétt í þessu bréf frá almannavarnarnefndar höfuðborgarsvæðiðsins. Í því kemur fram að í húsum sem eru í eigu sveitarfélaga á höfuðborgarsvæðinu sé núna komin á sú regla að foreldrar og forráðamenn séu ekki viðstödd æfingar barna og ungmenna. Sjá má skjalið hér, PDF skjal – opnast í nýjum glugga.

Það sem má taka helst úr skjalinu eru þessir fjórir punktar:

  • Foreldrar og forráðamenn séu ekki viðstödd æfingar og frístundarstarf barna og komi ekki inn í íþróttasal
  • Hafi börn ekki þroska eða aldur til að vera ein í íþróttatíma t.d. íþróttaskóla barna þá fellur sá tími niður
  • Foreldrar og forráðamenn fylgi fyrirmælum um innkomu í íþróttasali
  • Starfsemi sem ekki tilheyrir ÍSÍ og þeirra reglum um sóttvarnir og skipan sóttvarnarfulltrúa er ekki heimil.

Þótt keilan sé ekki stunduð á höfuðborgarsvæðinu í írþóttahúsi í eigu borgar þá verður ekki annað hægt en að telja okkur með í þessi fyrirmæli. Foreldrar og forráðamenn keilukrakka eru því vinsamlega beðnir um að fara í einu og öllu eftir þessum fyrirmælum. Tæklum þetta saman og hjálpumst að við að halda keilunni gangandi.