Valgeir Guðbjartsson var rétt í þessu kjörinn varaforseti evrópska keilusambandsins ETBF til næstu 4 ára á ársþingi sambandsins sem fram fer í Munchen Þýskalandi. Valgeir hefur verið í stjórn ETBF í 14 ár og þar af sem framkvæmdastjóri þess s.l. 9 ár. Með því að ná kjöri sem varaforseti ETBF færast aðrar skyldur á Valgeir en hann mun m.a. núna sjá um evrópsku mótaröðina í keilu ásamt öðrum verkefnum.

Þetta er mikill heiður fyrir Valgeir og störf hans í sambandinu síðustu ár og óskar KLÍ honum til hamingju með kjörið.

KLÍ leitar að Íþróttastjóra í 50% starf og hefur starfið verið auglýst á bæði Störf.is og Alfreð. Umsóknarfrestur er til 18. júní n.k. Ráðið verður í stöðuna strax.

Aðalverkefni íþróttastjóra KLÍ er að:

• hafa yfirumsjón með landliðsverkefnum KLÍ, afrekshópum KLÍ og fylgja þar eftir afreksstefnu sambandsins
• vera í samskiptum við landsliðsþjálfara og landsliðsnefnd KLÍ, aðildarfélög þess, ÍSÍ og önnur sérsambönd eftir því sem við á
• skýrslugerðir ásamt öðrum tilfallandi verkefnum

Sunnudaginn 19. maí fór fram úrslit í AMF 2019.
Þar kepptu efstu 8 úr undankeppni frá í vetur. Spilaðar hafa verið 3 umferðir í vetur og fá efstu 12 í þeim keppnum stig til verðlauna. Þeir 8 keppendur sem að voru með flest stig úr þeim keppnum mættust svo á sunnudaginn og spiluðu round robin þar sem að allir keppa við alla. Eftir þá leiki mætast þeir sem að eru í 2. og 3. sæti og spila um það hver fær að mæta þeim sem er í 1. sæti eftir round robin. Keppa þeir um 1.sætið.
Sigurvegari mótsins vinnur sér inn keppnisrétt á næsta AMF World Cup, hótel gistingu og flug á staðinn.
Sá aðili af gagnstæða kyninu sem verður efstur/efst vinnur sér inn keppnisrétt á næsta AMF World Cup ásamt flugi og hótel gistingu.

Styrktaraðili keppninnar í ár er Keiluhöllin Egilshöll og þökkum við þeim kærlega fyrir styrkinn

Eftir 3.umferðir var staðan:
1.sæti Gunnar Þór Ásgeirsson með 23 stig
2.sæti Gústaf Smári Björnsson með 22 stig
3.sæti Hlynur Örn Ómarsson með 19 stig
4.sæti Andrés Páll Júlíusson með 12 stig
5.sæti Freyr Bragason með 12 stig
6.sæti Hafþór Harðarson með 12 stig
7.sæti Alexander Halldórsson með 12 stig
8.sæti Einar Már Björnsson með 8 stig

Eftir round robin var staðan þessi:
1.sæti Gústaf Smári Björnsson (KFR) með 1.577
2.sæti Hafþór Harðarson (ÍR) með 1.577
3.sæti Andrés Páll Júlíusson (ÍR) með 1.554
4.sæti Gunnar Þór Ásgeirsson (ÍR) með 1.512
5.sæti Hlynur Örn Ómarsson (ÍR) með 1.507
6.sæti Einar Már Björnsson (ÍR) með 1.335
7.sæti Freyr Bragason (KFR) með 1.291
8.sæti Alexander Halldórsson með 1254

Í fyrsta leik mættust 2. og 3. sætið.
Þar voru það Hafþór Harðarson og Andrés Páll Júlíusson sem að mættust.  Hafþór hafði betur 213 gegn 182 hjá Andrési.

Næst var það Gústaf Smári sem var í 1.sæti eftir round robin og Hafþór sem mættust og náði Hafþór að vinna þann leik 191 – 181.

AMF sigurvegari 2019 er Hafþór Harðarson (ÍR)
Sigurvegari kvenna er Dagný Edda Þórisdóttir (KFR)

Óskum við sigurvegurum til hamingju með árangurinn og þökkum við Keiluhöllinni stuðninginn við mótið í ár.

Sunnudaginn 12. maí s.l. var 26. Ársþing Keilusambands Íslands haldið í Íþróttamiðstöðinni Laugardal. KFR sá að þessu sinni um að hýsa þingið og  Á þingið mættu fulltrúar allra aðildarfélaga nema að fulltrúar Þórs komust ekki. Á þinginu sátu sem áheyrnarfulltrúar tveir aðilar frá Íþróttafélaginu Ösp.

Ekki lágu mörg mál fyrir þinginu en ljóst var að kjósa þurfti tvo aðalfulltrúa til tveggja ára í stjórn. Björgvin Helgi frá Þór gaf ekki kost á sér til áframhaldandi setu en S. Unnur Vilhjálmsdóttir KFR gaf hinsvegar kost á sér sem er fagnaðarefni. Hún ásamt Einari Jóel frá ÍA voru ein í framboði til aðalmanna í stjórn og voru því sjálfkjörin. Þrír gáfu kost á sér sem varamenn til eins árs og kom það í hlut Kjörnefndar að gera tillögu að röðun þeirra sem var samþykkt samhljóða en þeir eru í þessari röð: Stefán Ingi Óskarsson KFR, Stefán Claessen ÍR og Björn Kristinsson KR.

Á þinginu voru tveir aðilar sæmdir heiðursmerki KLÍ. Guðmundur Sigurðsson ÍA var sæmdur Gullmerki KLÍ fyrir áratuga störf sín í þágu keilunnar á Íslandi. Guðmundur er eins og keilarar þekkja til aðalmaðurinn á bakvið Keilufélag Akraness sem keppir undir merkjum ÍA. Svavar Þór Einarsson ÍR var sæmdur silfurmerki KLÍ fyrir störf sín í þágu keilunnar en Svavar hefur m.a. verið s.l. 3 ár aðalmaðurinn á bakvið Mótanefnd KLÍ auk þess að sinna öðrum störfum svo sem formaður ÍR Keiludeildar s.l. ár.

Þinggerð má sjá hér og Ársskýrslu má sjá hér.

Þær leiðu fréttir bárust að vinkona okkar hún Ragna Matthíasdóttir sem lék með KFR-Afturgöngunum er látin á 57. aldursári. Ragna lék undir merkjum KFR allan sinn feril. Varð hún m.a. þrívegis Íslandsmeistari öldunga nú síðast 2018. Einnig varð hún Íslandsmeistari para tvö ár í röð 2008 og 2009 auk þess að verða Íslands- og Bikarmeistari með liði sínu all nokkrum sinnum.

Keilusambandið sendir ættingjum Rögnu, liðsfélögum hennar og öllum vinum sínar dýpstu samúðarkveðjur.

Ragna Matthíasdóttir f. 24.09.1962 d. 04.05.2019

Útför hennar fer fram miðvikudaginn 15. maí 2019 kl. 13:00 frá Digraneskirkju, Kópavogi.

Í gær var seinni leikurinn í umspili um laust sæti í 1. deild kvenna tímabilið 2019 til 2020.
KFR Afturgöngur halda sæti sínu í deildinni en þær unnu stöllur sínar í KFR Skutlum 11 – 3 í gær
og kvöldið áður með 12 – 2 sigri. Sjá nánar hér.

 Liðin ÍR-PLS og ÍR-TT urðu í dag Íslandsmeistarar liða í karla- og kvennaflokki árið 2019. ÍR-PLS sigraði lið ÍR-KLS nokkuð örugglega og vörðu þar með titilinn sinn sem þeir unnu í fyrra. ÍR-TT sigraði lið ÍR-Buff í hörkuleik þar sem litlu munaði á liðunum. 

Í gærkvöldi var leikin 2. umferð af þrem í úrslitum á Íslandsmóti liða. Þar eigast við úr 1. deild karla ÍR liðin PLS, Íslandsmeistarar 2018, og KLS en bæði þessi lið eiga marga titla að baki. Í úrslitum úr 1. deild kvenna keppa einnig ÍR lið en það eru ÍR TT og ÍR Buff en bæði þessi lið hafa einnig nokkra titla í safni sínu.

Leikir gærkvöldsins fóru þannig að ÍR PLS vann ÍR KLS með 7,5 stigum gegn 6,5 og leiðir viðureignina með 18,5 stigum gegn 9,5. PLS drengjum nægja 3 stig í lokaumferðinni til að tryggja sér titilinn. ÍR TT snéri dæminu við og vann umferðina í gær með 11 stigum gegn 3 og þá er jafnt hjá konunum 14 stig gegn 14. Stöðuna má sjá hér.

Lokaumferð úrslitanna fer fram á laugardaginn kemur og hefst hún kl. 10 en á sama tíma fara fram lokaumferðir í öðrum deildarkeppnum KLÍ þennan veturinn. Um kvöldið fer svo fram lokahóf Keilusambandsins þar sem verðlaunaafhendingar verða.

Ný lið í neðstu deild karla og kvenna hafa til 31. júlí til að skrá lið til keppni.

Rafræna skráningu má finna hér

Búið er að breyta úrslitum í deildarkeppni 1. deildar kvenna fyrir tímabilið 2018 – 2019 – ÍR TT er deildarmeistari en KFR Valkyrjur færast í 3. sæti.

Eftir lokaumferð í 1. deild kvenna sem leikin var laugardaginn 30. mars s.l. kærðu ÍR TT lið KFR Valkyrjur til stjórnar KLÍ vegna meints ólögmæts leikmanns. Voru umferðir 15. og 20 kærðar af ÍR TT þar sem þessi tvö lið áttust við. Auk þess lagði KFR Afturgöngur inn kæru til stjórnar KLÍ vegna 19. umferðar. Málavextir eru þeir að liðsmaður KFR Valkyrja, Marika Katarina E. Lönnroth sem er erlendur ríkisborgari, lék ekki með liðinu fyrir 1. febrúar s.l. en í 13. gr. Reglugerðar um Íslandsmót liða segir að ef erlendur leikmaður sé í liði þurfi hann að hafa spilað fyrir 1. febrúar til að vera gjaldgengur.

Stjórn KLÍ tók málið fyrir og vísaði því frá sér þar sem það á heima fyrir Dómstól ÍSÍ sbr. dóma Dómstóls ÍSÍ #1/2018 og #3/2018.

ÍR TT kærði málið til dómstólsins og hefur Dómstóll ÍSÍ kveðið upp sína dóma # 3/2019 og # 4/2019 (á eftir að birta á vef ÍSÍ). KFR Afturgöngur kærðu málið ekki til Dómstóls ÍSÍ. Vísar dómstóllinn frá kæru varðandi 15. umferð þar sem kærufrestur var liðinn en hann dæmir leikmann KFR Valkyrja ólöglegan í 20. umferð og því ÍR TT sigur í viðureigninni 14 – 0. KFR Valkyrjur áfrýjuðu málinu til Áfrýjunardómstól ÍSÍ sem kvað upp sinn dóm í dag og staðfesti hann dóminn.

Miðað við dóm Dómstól ÍSÍ hefur hann áhrif á lokastöðu í 1. deild kvenna. KFR Valkyrjur sem urðu deildarmeistarar með 187 stig unnu ÍR TT 11 – 3 í 20. umferð sem er dæmd þeim töpuð. ÍR Buff er í 2. sæti með 178 stig og ÍR TT var í 3. sæti með 167 stig. Þar sem 11. stig dragast af KFR Valkyrjum verða þær þá með 176 stig, ÍR Buff heldur sínum 178 stigum og ÍR TT endar í 178 stigum, jafnar ÍR Buff að stigum. Þá þarf að skoða innbyrðis viðureignir ÍR TT og ÍR Buff og er ÍR TT þar með fleiri stig og verða þá deildarmeistarar 1. deildar kvenna 2019 og ÍR liðin keppa til úrslita um Íslandsmeistarartitil kvennaliða.

Fh. stjórnar KLÍ

Jóhann Ágúst Jóhannsson
Formaður