Í dag sunnudag og næstu tvo daga fara fram í Egilshöllinni kl. 19:00 úrslitaleikir í Íslandsmóti liða. Hjá körlum eru það lið ÍR KLS og KR C sem takast á, en hjá konum eru það lið KFR Valkyrja og ÍR Buff sem takast á og má búast við æsispennandi leikjum næstu þrjú kvöld. Viljum við hvetja keilara til að koma í Egilshöllina og styðja við sín lið eða bara njóta þess að horfa á toppliðin takast á um titilinn “ Íslandsmeistarar liða „. Munu ný lið skrá sig á spjöld sögunnar eða munu núverandi og fyrrverandi meistarar halda uppteknum hætti og bæta fleiri titlum við hjá sér ?

Það eru Deildarmeistararnir KFR-Valkyrjur og ÍR-Buff sem keppa til úrslita á Íslandsmóti liða í kvennaflokki og ÍR-KLS og KR-C sem keppa til úrslita í karlaflokki árið 2014. Það er því ljóst að krýndir verða nýir Íslandsmeistarar í kvennaflokki, en ÍR-KLS eiga enn möguleika á að verja titilinn í karlaflokki.

Sjá nánar úrslit og skor í úrslitakeppninni

Æsispennandi viðureignir fóru fram í kvöld í fyrri leik undanúrslitanna.

Í Öskjuhlíðinni áttust við KFR Afturgöngurnar og ÍR Buff og er óhætt að segja að það hafi verið kaflaskiptur leikur, þar sem Buffið vann 1. leikinn 6-0 en Afturgöngurnar unnu 2. leikinn 6-0 og því allt undir í síðasta leiknum og var staðan að loknum 3. leik 11.5 – 8.5 ÍR Buff í hag. 

Í Egilshöllinni áttust við hin kvennaliðin þ.e.a.s. KFR Valkyrjurnar og ÍR TT, ekki var leikurinn þar eins kaflaskiptur en 1. leik unnu Valkyrjurnar 4-2 en TT vann 2. leikinn 4-2 líka þannig að jafnt var fyrir síðasta leik og því allt undir og þar sýndu Valkyrjurnar úr hverju þær eru gerðar og unnu leikinn 5-1 og samtals 13 – 7. Hæsta leik og seríu átti Dagný Edda Þórisdóttir með 268/667.

Hjá körlunum áttust við annarsvegar ÍR PLS og KR C og er óhætt að segja að KRingarnir með gott stuðningslið á bakvið sig hafi nánast valtað yfir andstæðingana með sigri í öllum þrem leikjunum og byrjuðu 1. leik á 4-2, annan leikinn tóku þeir 5.5 – 0,5 og síðasta leikinn 5-1 og samtals 16,5 – 3,5. Hæstan leik átti Björn Birgisson með 246/639.

Hinsvegar áttust við ÍR KLS og ÍA W og byrjuðu núverandi meistarar á að taka 1. leikinn 4-2 og voru óheppnir að ná ekki 5 stiginu þar sem aðeins munaði einum pinna á Andrési og Aroni, 2. leik unnu þeir 5-1 og því komnir í 9-3 og staðan því ekki góð hjá skagamönnum fyrir síðasta leik, en þeir bitu í skjaldarrendurnar og áttu stórgóðan leik þar sem allir liðsmenn skoruðu yfir 200 en það nægði þeim til að vinna leikinn 5-1 en heildinni náðu þeir ekki af KLS mönnum sem unnu samtals 12 – 8. Hæstan leik og seríu átti Andrés Páll Júlíusson með 279/698.

Það verður því spennandi að fylgjast með seinni leik liðanna allra og sjá hverjir komast í úrslitin. 

Vonandi mæta sem flestir í Egilshöllina og á Skagann til að gera stemmninguna enn meiri og skemmtilegri fyrir okkur öll.

Leikið verður í undanúrslitum karla og kvenna á mánudag og þriðjudag.

 Þriðjudagur Egilshöll

Brautir 11-12 ÍR TT – KFR Valkyrjurnar, 38 fet

Brautir 13-14 ÍR Buff – KFR Afturgöngurnar, 38 fet

Brautir 15-16 KR C – ÍR PLS, 41 fet

Keilusalurinn Akranesi

Brautir 2-3 ÍA W – ÍR KLS, 38 fet

Mánudagur: Egilshöll

Brautir 11-12 ÍR PLS – KR C, 41fet

Brautir 13-14 ÍR KLS – ÍA W, 41fet

Brautir 15-16 KFR Valkyrjurnar – ÍR TT, 38fet

Öskjuhlíð

Brautir 5-6 KFR Afturgöngurnar – ÍR Buff, 41fet

 ÍR S, ÍFH Múrbrjótur og Þór-Plús sjónarmunur á milli og einn leikur eftir

ÍR Broskarlar fylgja ÍR L í 1. deild að ári 

Úrslitakeppni Utandeildar KLÍ fór fram í Keiluhöllinni í Öskjuhlíð fimmtudaginn 24. apríl. Í úrslitunum spiluðu tvö efstu liðin úr öllum þremur riðlum Utandeildarinnar, en þau voru Prentmet og ITS úr riðli 1, Eimskip og Landsbankinn úr riðli 2 og RB og Keiluhöllin Egilshöll úr riðli 3. Að lokum fór svo að lið Prentmets tryggði sér Utandeildarmeistaratitilinn í fyrsta sinn með frábærum lokaleik. Í 2. sæti var lið ITS og í 3. sæti RB.

Með liði Prentmets spiluðu í vetur Róbert Ericsson, Guðjón Garðarsson, Vigfús Þór Kristinsson, Guðjón Reyr Þorsteinsson og Axel Þórleifsson.

Utandeildin er í umsjón landsliðsnefndar KLÍ

Þann 8. apríl s.l. var viðtal við Andrés Hauk Hreinsson formann mótanefndar KLÍ í Sportþættinum með Gesti frá Hæli sem er á  mánudagskvöldum á útvarp Suðurland FM 96,3. Gestur er þekktur fyrir að segja frá íþróttum sem eiga síður uppá pallborðið hjá stærri útvarpsstöðvunum. Hlýða má á viðtalið hér

Nú er að renna upp síðasta keppnisvikan á Íslandsmóti liða í keilu á keppnistímabilinu 2013 – 2014 þar sem fara fram leikir í tveimur síðustu umferðum í öllum deildum. ÍR-PLS er því sem næst búið að tryggja sér Deildarmeistaratitilinn í 1. deild karla og KFR-Valkyrjur sömuleiðis í 1. deild kvenna og nokkuð ljóst er orðið hvaða lið keppa til úrslita um Íslandsmeistaratitlana.

Á morgun laugardaginn 26. apríl tekur Þór-Plús á móti ÍR-Fagmönnum í Keilunni á Akureyri í 20. umferð í 3. deild karla og á sunnudaginn 27. apríl mætast Skagaliðin ÍA-W og ÍA í 17. umferð 1. deildar karla og ÍA-B tekur á móti ÍFH-Stuðboltum í 3. deild karla í Keilusalnum á Akranesi. Á mánudag 28. apríl tekur kvennalið ÍA á síðan á móti ÍR-TT á Skaganum í fyrsta leiknum í 21. umferð í 1. deild kvenna.

Á mánudaginn mætast í Öskjuhlíðinni í 17. umferð 2. deild karla ÍR-Broskarlar og ÍR-Blikk, ÍR-L og KFR-JP-kast og ÍR-NAS og ÍR-Naddóður og í Egilshöllinni eigast við ÍR-A og KFR-Þrestir, ÍR-T og ÍR-Keila.is. Og í 3. deild karla mætast í Öskjuhlíðinni ÍR-Gaurar og ÍFH-Múrbrjótur og í Egilshöllinni ÍR-S og KR-D.

Á þriðjudag 29. apríl fara þrír leikir fram í Öskjuhlíðinni í 1. deild kvenna. ÍR-KK tekur á móti KFR-Valkyrjum, ÍR-N og KFR-Afturgöngurnar mætast og einnig ÍR-BK og ÍR-SK. Í Egilshöllinni tekur ÍR-Buff á móti KFR-Skutlunum. ÍFH-Elding situr hjá í 21. umferð. Í 1. deild karla tekur KR-B á móti ÍR-KLS í Öskjuhlíðinni, en í Egilshöllinni tekur ÍR-PLS á móti KR-C og KFR-Lærlingar taka á móti KR-A.

Síðasta umferð í öllum deildum fer síðan fram laugardaginn 3. maí og árshátíð KLÍ verður haldin á Rúbín um kvöldið. Sjá dagskrá og stöðuna í deildunum

Spilað er í olíuburðinum 2010 EBT Bowltech Aalborg International 38 fet.

KFR-Valkyrjur og ÍR-KLS eru Bikarmeistarar liða í keilu 2014, en liðin tryggðu sér sigur í úrslitum Bikarkeppni liða í keilu 2014 sem fóru fram í Keiluhöllinni Egilshöll miðvikudagskvöldið 23. apríl.

KFR-Valkyrjur voru að vinna titilinn í áttunda sinn, en þær voru meðal annars Bikarmeistarar 6 ár í röð á árunum 2004 til 2009. ÍR-KLS vann titililinn fimmta árið í röð og í tíunda skipti alls.

Lið ÍR-KLS vann lið KFR-Lærlinganna í bráðabana eftir fjóra leiki sem fóru 2 – 2. ÍR-KLS vann fyrstu tvo leikina, fyrri leikinn með 891 gegn 814 hjá KFR-Lærlingum og annan leikinn með stórleik uppá 945 á móti 808. KFR-Lærlingar létu það þó ekki slá sig útaf laginu og komu ákveðnir til leiks í þriðja leik og unnu hann með 815 á móti 800 hjá ÍR-KLS. Ákveðnir í að halda uppteknum hætti unnu KFR-Lærlingar svo fjórða leikinn með 837 á móti 793 hjá ÍR-KLS og tryggðu sér þar með bráðabana.

Undir lok fjórða leiksins fór brunakerfið í gang og gall kallkerfið við í hæsta styrk með fagurri kvenmannsrödd sem bað viðstadda ítrekað um að halda kyrru fyrir  á meðan komist væri að því hvað væri að, það endaði svo með því að allir voru beðnir um að rýma húsið og fór að finnast vond lykt og reykjarský sást í salnum. Allt endaði þetta vel og þurftum við ekki að yfirgefa salinn að fullu enda hafði bara brunnið yfir mótor á einni brautinni innst í húsinu og var húsið reyk og lyktarræst með því að opna allt uppá gátt og fannst fólki þá loftræstingin loksins virka í salnum og vera viðunandi hitastig þar.

Þegar allir voru komnir inn aftur var tekið til við að spila 9-10 ramma, KFR-Lærlingar felldu allir í 9. ramma en ÍR-KLS náðu 2 feykjum, opnum og einni fellu í 9. ramma og voru frekar niðurlútir í upphafi 10. ramma, en það breyttist fljótt þegar fyrstu mönnum Lærlinganna mistókst að halda uppteknum hætti og náðu ÍR-KLS að klára leikinn með 145 gegn 127 hjá KFR-Lærlingum. Samtals spiluðu ÍR-KLS 3574 eða 212,74 að meðaltali en KFR-Lærlingar spiluðu samtals 3401 eða 202,44 að meðaltali.

Lið KFR-Valkyrjanna vann lið ÍR-Buff 3 – 1. KFR-Valkyrjur unnu fyrstu tvo leikina, þann fyrri með einungis 8 pinna mun, 720 gegn 712 hjá ÍR-Buff og annan leikinn með 658 gegn 562. ÍR-Buff konur komu ákveðnar til leiks í þriðja leik og unnu hann með 715 gegn 630 hjá KFR-Valkyrjum. Fjórða leikinn unnu svo KFR-Valkyrjur með 646 gegn 624 hjá ÍR-Buff eftir tafir vegna rýmingar. Samtals spiluðu KFR-Valkyrjur 2654 eða 165.88 að meðaltali í leik en ÍR-Buff spilaði samtals 2613 eða 163,31 að meðaltali.

Sjá leikskýrslur og skor HÉR.

Það var lið ÍR-PLS sem bar sigur úr býtum í úrslitum Deildarbikars liða 2013 – 2014 sem fram fóru í Keiluhöllinni Egilshöll þriðjudaginn 22. apríl. Leikmenn ÍR-PLS mættu  til keppni þyrstir í sigur og unnu 4 leiki af 5 og fengu 8 stig og hlutu þar með titilinn sem þeir unnu einnig árin 2007 og 2008. Í 2. sæti urðu KFR-Afturgöngurnar með 6 stig og unna innbyrðis viðureign við ÍR-KLS sem varð í 3. sæti einnig með 6 stig.

Á myndinni eru liðsmenn ÍR-PLS þeir Hafþór Harðarson, Einar Már Björnsson, Róbert Dan Sigurðsson, Bjarni Páll Jakobsson og Hörður Ingi Jóhannsson.

 Úrslit keppninnar urðu sem hér segir:

1. sæti ÍR-PLS  8 stig
2. sæti KFR-Afturgöngurnar 6 stig
3. sæti ÍR-KLS  6 stig
4. sæti ÍR-TT  4 stig
5. sæti ÍA-W  4 stig
6. sæti KR-B   2 stig 

Sjá leikskýrslur og skor HÉR.