Í dag voru spilaðir fyrri 3 leikirnir í liðakeppni 5 manna liða á Evrópumóti karlalandsliða í keilu en mótið fer fram í Þýskalandi eins og fram hefur komið. Íslenska liðið er skipað þeim Andrési Páli, Arnari Davíð, Einari Má, Gunnari Þór og Jóni Inga. Strákarnir fóru heldur betur vel af stað og spiluðu fyrsta leikinn með 1.125 pinnum eða 225,0 í meðaltal og fóru í efsta sætið. Þeir gáfu síðan ögn eftir í næstu tveim leikjum sem fóru 907 og 938. Eru þeir með samtals 2.970 pinna eða 198 meðaltal og eru í 10. sæti eftir fyrri hlutann af alls 31 liðum. Best spilaði Andrés Páll en hann var með 644 seríu eða 214,7 í meðaltal.

Arnar Davíð er sem stendur í 21. sæti í heildarkeppni einstaklinga í mótinu, Andrés Páll er að banka á 24. manna dyrnar en hann er í 27. sæti með 202,6 í meðaltal. Íslandsvinurinn Mattias Wetterberg frá Svíþjóð er í 24. sætinu með 203,2.

Seinni leikirnir fara svo fram á morgun kl. 7 að íslenskum tíma. Hægt er að horfa á beina útsendingu á YouTube og svo eru skor, stöður og allar upplýsingar á vefsíðu mótsins.

Í dag voru leiknir 3 leikir af 6 í forkeppni þrímennings á EM karlalandsliða í Þýskalandi. Í fyrri riðlinum léku þeir Gunnar Þór Ásgeirsson, Gústaf Smári Björnsson og Einar Már Björnsson og léku þeir leikina á 1.758 pinnum eða 195,3 í meðaltal. Sitja þeir í 27. sæti af 61. Best spilaði Gunnar Þór en hann var með 612 seríu.

Næst léku svo þeir Andrés Páll Júlíusson, Arnar Davíð Jónsson og Jón Ingi Ragnarsson. Léku þeir sína þrjá leiki á 1.784 eða 198,2 að meðaltali. Eru þeir í 19. sæti. Best spilaði Andrés Páll en hann var með 617 seríu.

Seinni þrír leikirnir í þrímenningi verða leiknir á morgun 17. júní og verða úrslit leikin milli 4 efstu strax á eftir forkeppninni.

Arnar Davíð situr nú í 12. sæti í heildarkeppni mótsins og hefur fallið niður um 4 sæti frá í gær. Andrés Páll er í 37. sæti, Jón Ingi er í 56. sæti, Gunnar Þór í 98. sæti Gústaf Smári í því 104. og Einar Már í 122. sæti.

Allar upplýsingar um mótið má finna á vefsíðu þess.

Nú rétt í þessu lauk forkeppni í tvímenningi á Evrópumóti karlalandsliða í keilu en keppt er í Dream-Bowl Palace salnum í Munchen Þýskalandi. Arnar Davíð Jónsson og Jón Ingi Ragnarsson léku best íslensku keppendanna en þeir náðu 6. sæti með 2.488 pinna eða 207,3 í meðaltal og voru aðeins 7 pinnum frá því að komast í 4. sætið og í úrslit tvímenningsins.

Þeir Arnar og Jón lentu eins og segir í 6. sæti en alls voru 94 tvímenningar að keppa. Þeir Andrés Páll Júlíusson og Gústaf Smári Björnsson enduðu í 45. sæti og Einar Már Björnsson og Gunnar Þór Ásgeirsson enduðu í 49. sæti.

Til úrslita í tvímenningi leika á eftir m.a. Íslandsvinurinn Jesper Agerbo frá Danmörku en hann keppir með Thomas Larsen og urðu þeir í efsta sæti í forkeppninni með 2.654 pinna eða 221,2 i meðaltal. Þeir leika við félaga sína þá Mik Stampe og Carsten Warming Hansen en þeir urðu í 4. sæti. Julien Sermand og Valentin Saulnier frá Frakklandi urðu í 2. sæti en Valentin gerði sér lítið fyrir og lék fullkominn leik eða 300 sem er annar 300 leikur mótsins. Þeir leika við Finnana Tomas Käyhkö og Niko Oksanen.

Á mótum sem þessum er svokölluð All events keppni þar sem 24 meðaltals efstu keilarar leika til úrslita. Arnar Davíð Jónsson er þar sem stendur í 8. sæti eftir einstaklings- og tvímenningskeppnina. Andrés Páll Júlíusson kemur þar á eftir en hann er í 39. sæti.

Sigurvegari einstaklingskeppninnar, sem var fyrsta keppni mótsins, varð Englendingurinn Matty Clayton en hann sigraði heimamanninn Tobias Börding með 190 pinnum gegn 180 í þokkalega spennandi leik.

Á morgun hefst svo keppni í þrímenningi en þá eru leiknir 6 leikir í tveim riðlum og í lok dags verða úrslit í þeirri keppni. Ekki liggur fyrir á þessari stundu hvernig íslensku liðin verða skipuð en líkleg skipan eru Arnar Davíð, Jón Ingi og Andrés Páll annarsvegar og svo Einar Már, Gunnar Þór og Gústaf Smári hinsvegar.

Allar upplýsingar um mótið má finna á vefsíðu þess. Þar er hægt að sjá stöður í mótinu, skor í rauntíma, sjá beinar útsendingar á YouTube og fleira.

Nú rétt fyrir hádegi lauk forkeppni einstaklingskeppni á Evrópumóti karlaliða í keilu en leikið er í Dream-Bowl Palace salnum í Munchen Þýskalandi. Arnar Davíð Jónsson KFR / Höganas spilaði best íslensku keppenda en hann lék sína 6 leikja seríu með 1.247 eða 207,8 í meðaltal. Sá árangur skilaði honum í 26. sæti af alls 187 keppendum. Næstir komu:

49. sæti – Andrés Páll Júlíusson ÍR 1.193 / 198,8 mtl.
50. sæti – Jón Ingi Ragnarsson KFR / BK Brio 1.191 / 198,5 mtl.
51. sæti – Gústaf Smári Björnsson KFR 1.164 / 194,0 mtl.
52. sæti – Einar Már Björnsson ÍR 1.111 / 185,2 mtl
53. sæti – Gunnar Þór Ásgeirsson ÍR 1.105 / 184,2 mtl

Efstur eftir forkeppni mótsins er Gaetan Mouveroux Frakklandi með 1.377 / 229,5 mtl. en hann er eini keppandinn sem hefur náð fullkomnum leik í mótinu, 300 í 4. leik dagsins. Annar er Xander van Mazijk Hollandi með 1.3.44 / 224,0, þriðji er Matty Clayton Englandi með 1.340 / 223,3 mtl. og fjórði er Tobias Börding Þýskalandi með 1.331 / 221,8 mtl. Þessir fjórir keilarar mætast núna kl. 12:45 í undanúrslitum og svo eru úrslit spiluð strax á eftir.

Á morgun hefst svo keppni í tvímenningi en þá leika saman Einar Már og Gunnar Þór í riðli 1 og hefja þeir keppni kl. 7 að íslenskum tíma. Andrés Páll og Gústaf Smári í riðli 2 og hefja þeir leik kl. 11:45 og loks leika þeir Arnar Davíð og Jón Ingi saman í riðli 3 en hann verður á laugardaginn kl. 8.

Allar upplýsingar um mótið má finna á vefsíðu þess, bein textalýsing, beinar útsendingar á vefnum og fleira.

Í dag hefur A landslið Íslands leik á Evrópumót karlalandsliða 2019 en leikið er í DreamBowl keilusalnum í Munchen Þýskalandi en sá salur er stærsti keilusalur Evrópu, alls 52 brautir. Mótið stendur yfir frá 12. júní og lýkur fimmtudaginn í næstu viku eða þann 20. Ísland sendir fullt lið til keppni eða 6 keppendur auk þjálfara og fararstjóra. Þeir eru:

• Andrés Páll Júlíusson ÍR
• Arnar Davíð Jónsson KFR / Hauganes Svíþjóð
• Einar Már Björnsson ÍR
• Gunnar Þór Ásgeirsson ÍR
• Gústaf Smári Björnsson KFR
• Jón Ingi Ragnarsson KFR / BK Brio Svíþjóð

Þjálfari er Robert Anderson Svíþjóð og fararstjóri er Hafþór Harðarson.

Dagskrá mótsins er sem segir:

12.6. – Einstaklingskeppni
13.6. – Einstaklingskeppni – Lokaumferð og úrslit
14.6. – Tvímenningur
15.6. – Tvímenningur – Lokaumferð og úrslit
16.6. – Þrímenningur
17.6. – Þrímenningur – Lokaumferð og úrslit
18.6. – Liðakeppni 4 manna
19.6. – Liðakeppni 4 manna – Lokaumferð og úrslit
20.6. – Masterskeppni 24 efstu einstaklinga úr öllum keppnum – Úrslit

Allar upplýsingar um mótið má finna á vefsíðu þess. Upplýsingasíða er einnig á Fésbókarsíðu mótsins og streymt verður frá öllum viðburðum á YouTube rás. Einnig er hægt að fylgjast með niðurstöðu leikja í textalýsingu. Olíuburðinn, sem er sérhannaður fyrir mótið, má finna hér.