Í dag léku Guðmundur Sigurðsson ÍA og Þórarinn Már Þorbjörnsson í tvímenningi á Master Super World Championship mótinu í Dubai. Gerðu þeir sér lítið fyrir og enduðu í 15. sæti og komast þar með áfram í keppninni. Léku þeir leikina 10 á 2.068 pinnum eða 206,8 meðaltal en keppt er í svokölluðu Baker fyrirkomulagi þar sem hver keppandi leikur einn ramma og svo næsti keppandi.

Efstir í keppninni eru Parker Bohn III og Bob Learn með 2.363 pinna.

Allar upplýsingar um mótið má finna hér.

Þórarinn, Guðmundur og Hörður Ingi þjálfari á góðri stund í Dubai.

Þessa dagana fer fram Masters mótið á SWC í Dubai en Íslendingar eiga 6 keppendur á því móti. Þetta er Heimsmeistaramót öldunga og keppt er í 50+ og 65+ flokkum karla og kvenna.

Í gær léku karlarnir sína fyrri 5 leiki en sama snið er á þessu móti og Heimsmeistaramóti A landsliða sem lauk á dögunum. Guðmundur Sigurðsson ÍA leikur í 50+ flokki og er í 48. sæti eftir fyrri leikina með 968 seríu eða 193,6 í meðaltal. Leikirnir voru: 237-139-176-212-204. Þórarinn Már Þorbjörnsson leikur í 65+ flokki og er í 7. sæti með 981 seríu eða 196,2 í meðaltal. Leikirnir voru: 221-184-220-179-177.

Síðan var komið að konunum að leika. Helga Sigurðardóttir úr KFR gerði sér lítið fyrir og tyllti sér í 4. sætið í 50+ flokki kvenna í sínum riðli með 948 seríu eða 189,6 í meðaltal. Leikirnir hjá henni voru: 191-216-198-203-140. Helga er í 18. sæti þegar báðir riðlar hafa leikið sína fyrri leiki. Linda Hrönn Magnúsdóttir úr ÍR sem einnig keppti í A landsliði kvenna á dögunum lék sína leiki á 848 pinnum eða 169,6 í meðaltal. Leikirnir hennar voru: 168-147-191-168-174 og er hún í 45. sæti.

Í seinni riðlinum léku þær Bára Ágústsdóttir ÍR og Laufey Sigurðardóttir ÍR. Bára er í 36. sæti samanlagt með 888 seríu eða 177,8 í meðaltal. Leikir hennar voru 160-147-168-182-231. Laufey er síðan í 62. sæti með 634 seríu eða 126,8 í meðaltal. Hennar leikir voru: 105-155-138-88-148.

Best í 50+ flokki kvenna á mótinu í gær varð hin finnska Tamminen en hún lék leikina 5 á 1.078 eða 215,6 meðaltal. Bestur hjá körlum í 50+ varð Bandaríkjamaðurinn Tom Hess með 1.270 seríu eða 254,0 í meðaltal. Nokkrir þekktir leikmenn eru í 50+ flokki karla. Þar má helst nefna Bandaríkjamennina Chris Barnes sem er í 4. sæti með 1.193 / 238,6, Parker Bohn III er þar á eftir í 5. sæti með 1.169 / 233,8. Tore Torgersen frá Noregi er í 3. sæti með 1.196 / 239,2.

Hópurinn sem keppir í Masters keppninni á Super World Champpionship í Dubai. Frá vinstri: Þórarinn Már Þorbjörnsson ÍR, Guðmundur Sigurðsson ÍA, Linda Hrönn Magnúsdóttir ÍR, Laufey Sigurðardóttir ÍR, Helga Sigurðardóttir KFR og Bára Ágústsdóttir ÍR. Þjálfari hópsins og líklegur myndasmiður er Hörður Ingi Jóhannsson ÍR.

Núna er Super World Championship hjá A liðum karla og kvenna lokið og við tekur heimsþing IBF sem og keppni öldunga (50+) á SWC. Lið heldri keilara hélt af stað síðustu nótt og mætti á leiðinni hluta úr hópnum sem er á leiðinni heim og var þessi mynd tekin af því tilefni.

Þau sem halda nú af stað til keppni eru:

• Bára Ágústsdóttir ÍR
• Helga Sigurðardóttir KFR
• Laufey Sigurðardóttir ÍR
• Linda Hrönn Magnúsdóttir ÍR (þegar stödd í Dubai)
• Guðmundur Sigurðsson ÍA
• Þórarinn Már Þorbjörnsson ÍR

Þjálfari í ferðinni er Hörður Ingi Jóhannsson

Til gamans má geta að öll þessi Sigurðarbörn eru ekki systkini.

Á myndinni eru frá vinstri:

Margrét Björg Jónsdóttir ÍR, Skúli Freyr Sigurðsson KFR, Gústaf Smári Björnsson KFR, Gunnar Þór Ásgeirsson ÍR, Nanna Hólm Davíðsdóttir ÍR, Bára Ágústsdóttir ÍR, Hörður Ingi Jóhannsson ÍR, Þórarinn Már Þorbjörnsson ÍR og Laufey Sigurðardóttir ÍR. Myndina tók Helga Sigurðardóttir KFR.

Hægt er að fylgjast með mótinu og úrslitum þess á vef mótsins en segjast verður að við höfum séð betri upplýsingavefi varðandi keilukeppnir. Fólk er þó hvatt til að skoða vefinn, sjá úrslit og eftir atvikum fylgjast með beinum útsendingum frá keppninni.

Í gær laugardag fóru fram fyrri 5 leikirnir í einstaklingskeppninni í Super World Championship (SWC) í Dubai. Fyrst spiluðu þær Helga Ósk Freysdóttir og Margrét Björg Jónsdóttir í fyrra hollinu. Þá var komið að þeim Gústaf Smára Björnssyni og Guðlaugi Valgeirssyni en strax á eftir þeim fóru þær Linda Hrönn Magnúsdóttir og Nanna Hólm Davíðsdóttir upp á brautirnar. Það voru síðan þeir Arnar Davíð Jónsson og Gunnar Þór Ásgeirsson sem lokuðu deginum hjá Íslendingum í Dubai.

Leikarnir fóru svona hjá okkar fólki:

Konur

• Helga Ósk Freysdóttir 68. sæti með 906 pinna eða 181,2 mtl. – 192-196-182-140-196
• Linda Hrönn Magnúsdóttir 79. sæti með 864 pinna eða 172,8 mtl. – 172-202-174-178-138
• Margrét Björg Jónsdóttir 88. sæti með 799 pinna eða 159,8 mtl. – 156-131-170-185-157
• Nanna Hólm Dagíðsdóttir 90. sæti með 795 pinna eða 159,0 mtl – 171-155-150-178-141

Karlar

• Arnar Davíð Jónsson 54. sæti með 1.067 pinna eða 213,4 mtl. – 182-233-237-186-229
• Guðlaugur Valgeirsson 56. sæti með 1.066 pinna eða 213,2 mtl. – 258-197-222-185-204
• Gunnar Þór Ásgeirsson 111. sæti með 945 pinna eða 189,8 mtl. – 158-181-174-226-206
• Gústaf Smári Björnsson 126. sæti með 832 pinna eða 166,4 mtl. – 154-179-131-168-200

Best kvenna á mótinu spilaði hin enska Verity Crawley en hún lék leikina 5 á 1.224 pinnum eða 244,8 í meðaltal. Leikirnir hjá henni voru 229-243-279-248-225. Kelly Kilick frá Bandaríkjunum er næst á eftir henni með 1.218 pinna eða 243,6 í meðaltal. Til gamans má geta að Verity mun vera með okkur á RIG 2022 mótinu sem fram fer eftir áramót.

Bestur hjá körlunum í gær var hinn sænski Jesper Svensson sem átti ótrúlega seríu sem er óstaðfest heimsmet í 5. leikjum karla. Spilaði hann 1.345 pinna eða 269,0 í meðaltal. Stóðu leikirnir saman af 269-259-279-279-259. Til gamans má geta að 279 leikur samanstendur af 11 fellum af 12 mögulegum með einu kasti sem leikmaður nær 9 pinnum en feykir svo. Jesper var þarna með tvo slíka í röð. Sannarlega ótrúleg spilamennska hjá líklega einum besta keilara heimsins í dag. Annar hjá körlum er A. Alkiwai frá Sadi Arabíu með 1.313 seríu en hann gerði sér lítið fyrir og var með tvo fullkomna leiki í seríunni 300-267-207-239-300.

Þegar þetta er skrifað er tvímenningskeppnin hafin. Er hún sett þarna inn á milli einstaklingsleikjanna og byrjuðu þeir Arnar Davíð og Guðlaugur leika fyrir okkar hönd. Eru þeir eftir leikina 5 í 24. sæti með 1.995 pinna eða 199,5 í meðaltal.

Hægt er að fylgjast með mótinu á vefsíðu þess en ákveðin vandræði hafa verið með síðuna og verið er að vinna í uppfærslum og breytingum á henni. En þar er hægt að sjá skor úr mótinu og komast í hlekki til að sjá beina útsendingu úr salnum í Dubai.