Í kvöld fer fram 5. umferð í deildarbikar liða, en í ár eru leiknar 6 umferðir.
8 liða úrslit í Bikarkeppni KLÍ
Á fimmtudag fór fram fyrsti leikur í 8 liða úrslitum Bikarkeppninnar, þegar KFA-ÍA tóku á móti ÍR-TT. Gestirnir fóru með sigur af hólmi, en þær sigruðu alla þrjá leikina, 633-505, 640-485 og 635-462.
Í karlaflokki fór svo fram leikur ÍA og ÍR-L á sunnudag og var skor eftirfarandi:
ÍA 728 – 714 – 646 – 727 alls 2815
ÍR-L 672 – 748 – 768 – 714 alls 2902
Eftir 4 leiki var jafnt 2-2 og því spilaður bráðabani. ÍR-L vann þar 146 gegn 145 eða með einum pinna.
Keiludeild ÍR fær styrk til þjálfaramenntunar
Menntamálaráðherra hefur samþykkt að veita rúmum tuttugu milljónum í styrki til 90 verkefna að tillögu Íþróttanefndar. Alls bárust 158 umsóknir um styrki úr Íþróttasjóði að upphæð 177 milljónir króna vegna ársins 2008.
Á meðal þeirra sem fengu styrk er Keiludeild ÍR, sem fær 100.000 krónur til menntunar keiluþjálfara.
Íslandsmeistarar með forgjöf báðir úr KFK
Það voru þau Anna Kristín Óladóttir og Sigurður Björn Bjarkason, bæði úr KFK, sem stóðu uppi sem Íslandsmeistarar með forgjöf, en undanúrslit og úrslit fóru fram í Keiluhöllinni í kvöld.
Eftir 5 leiki í undanúrslitum, þar sem 6 efstu konurnar léku allar við allar, var Anna Kristín með 10 pinna forskot á þær Ástrósu Pétursdóttur úr ÍR og Sigrúnu Hulds Hrafnsdóttur úr KFR sem voru jafnar í öðru til þriðja sæti. Það var Ástrós sem lék síðasta leikinn í undanúrslitunum betur og lék því til úrslita gegn Önnu Kristínu. Anna Kristín sigraði fyrsta leikinn naumlega með 188 gegn 183, en Ástrós átti mjög góðan annan leikinn, sigraði hann með 259 gegn 193. Í þriðja leiknum náði Anna Kristín aftur yfirhöndinni og tryggði sér Íslandsmeistaratitilinn með því að sigra hann, 231 gegn 170. Ástrós endaði því í öðru sæti, og Sigrún Huld í því þriðja.
Það var einnig mjótt á mununum í karlaflokknum í undanúrslitunum. Aðeins munaði 6 pinnum á fyrsta og öðru sæti, en efstur var Sigurður Björn Bjarkason úr KFK með 1.577, annar Andrés Páll Júlíusson úr KR með 1.571 og í þriðja sæti Einar Már Björnsson úr KR, 15 pinnum á eftir, með 1.556. Í úrslitum mættust því þeir Sigurður og Andrés, en Sigurður tryggði sér sigurinn með því að sigra Andrés 228-217 og 194-159.
Þetta er í fyrsta sinn sem Keilufélagið Keila, KFK, eignast Íslandsmeistara í einstaklingsflokki, en aðeins eru rétt rúm fjögur ár síðan félagið var stofnað.
Hjóna- og paramót KFR
Fimmta umferð í hjónamóti KFR og Morandé var leikin á sunnudag og tóku 14 pör þátt í þetta sinn. Án forgjafar voru Dóra og Tóti í fyrsta sæti, Ragna og Bjarni í öðru og Steinunn og Ólafur í þriðja. Með forgjöf voru Bára og Tóti í fyrsta, Ástrós og Palli í öðru og Vilborg og Einar í því þriðja. Næsta umferð verður leikin 2. mars.Spenna í milliriðlum
Eftir milliriðlana sem fram fóru í kvöld trónir Sigrún Huld Hrafnsdóttir úr KFR á toppnum í kvennaflokki með 1.711 eða 213,9 að meðaltali, 107 pinnum á undan Önnu S. Magnúsdóttur úr ÍR. Í þriðja sæti er Anna Kristín Óladóttir úr KFK.
Aðeins sex konur halda áfram í undanúrslit og var mikil spenna í kringum fimmta og sjötta sætið, en fjórar konur röðuðu sér í fimmta til átta sæta og skildi aðeins einn pinni eina að frá annarri.
Sigurður Björn Bjarkason úr KFKl, sem var í 14. sæti eftir forkeppni, er nú með góða forystu í karlaflokki, 85 pinna. Næstur á eftir honum er Sigurður Guðmundsson úr KFA, og í þriðja sæti Einar Már Björnsson úr KR. Átta karlar leika í undanúrslitum.
Undanúrslit og úrslit fara fram annað kvöld, en keppni hefst klukkan 19:00 í Keiluhöllinni.
Íslandsmót með forgjöf – staðan eftir forkeppni
Í morgun lauk forkeppninni í Íslandsmóti einstaklinga með forgjöf. Í kvennaflokki er staða efstu þriggja óbreytt, en þær sem komast áfram eru Linda Hrönn Magnúsdóttir og Berglind Scheving úr ÍR og Anna Kristin Óladóttir úr KFK. Róbert Dan Sigurðsson úr ÍR lék allra best í morgun, en hann spilaði 878 og stökk þannig beint í fyrsta sæti í karlaflokki. Aðrir komust ekki áfram af þeim sem léku í morgun.
Milliriðill fer fram annað kvöld, en keppni hefst kl. 19:00
Íslandsmót einstaklinga
Íslandsmót einstaklinga verður haldið dagana 23. febrúar – 4. mars 2008 í Keiluhöllinni. Spilaðir eru 12 leikir í forkeppni, og komast 16 efstu karlar og 12 efstu konur áfram í milliriðil þar sem leiknir eru 6 leikir. Að honum loknum halda 8 karlar og 6 konur áfram í undanúrslit þar sem leikið er allir við alla.
Skráning fer fram í netfanginu skraning (hjá) kli.is og stendur hún til kl. 22:00 miðvikudaginn 20. febrúar.
Staðan eftir fyrsta leikdag
Í morgun hófst keppni í Íslandsmóti einstaklinga með forgjöf, þegar 17 konur og 27 karlar léku í Keiluhöllinni. Í fyrramálið lýkur forkeppninni, þegar 9 karlar og 6 konur leika.
Eftir fyrri leikdag eru ljós að 6 efstu konurnar og 7 efstu karlarnir sem léku í morgun eru örugg áfram í milliriðil. Í kvennaflokki er Ástrós Pétursdóttir úr ÍR efst með 867, næst kemur Sigrún Huld Hrafnsdóttir úr KFR með 846 og í þriðja sæti er Steinunn Inga Guðmundsdóttir úr KFA með 822.
Snæbjörn B. Þormóðsson úr ÍR er efstur í karlaflokki með 841, Halldór Ragnar Halldórsson úr ÍR er skammt á eftir með 839, og í þriðja sæti er Andrés Páll Júlíusson úr KR með 828.
Keppni heldur áfram klukkan 9:00 í fyramálið, en milliriðill hefst fram klukkan 19:00 á mánudag.
Brautaskipan í Íslandsmóti einstaklinga með forgjöf
Í gærkvöld lauk skráningu í Íslandsmót einstaklinga með forgjöf, og eru 36 karlar og 22 konur skráðar til leiks.
Mun fleiri völdu að spila forkeppnina á laugardeginum, eða 45, en 13 spila á sunnudag. Keppni hefst klukkan 9:00 báða dagana.
Við viljum minna keppendur að greiða keppnisgjald fyrir mót með millifærslu, eða með reiðufé á mótsstað áður en keppni hefst. Sjá nánar í auglýsingu.
