Skip to content

Íslandsmeistarar einstaklinga með forgjöf 2013

Share on facebook
Facebook
Share on twitter
Twitter

Hafdís Pála Jónasdóttir KFR og Kristófer John Unnsteinsson ÍR eru Íslandsmeistarar einstaklinga með forgjöf 2013 og er þetta í fyrsta sinn sem þau vinna þennan titil. Í 2. sæti voru Vilborg Lúðvíksdóttir ÍA og Baldur Hauksson ÍFH og í 3. sæti voru Ragna Matthíasdóttir KFR og Andri Freyr Jónsson KFR. Óskum við þeim öllum til hamingju með árangurinn.

Keppni á Íslandsmóti einstaklinga í keilu með forgjöf 2013 fór fram í Keiluhöllinni í Öskjuhlíð og Keiluhöllinni í Egilshöll dagana 2. – 5. mars. Alls tóku 15 konur og 31 karl þátt í forkeppni mótsins og er það svipaður fjöldi og undanfarin ár. Í forkeppninni var spilað annan daginn í Keiluhöllinni í Öskjuhlíð og hinn daginn í Keiluhöllinni í Egilshöll, en keppni í milliriðli, undanúrslitum og úrslitum fór fram í Keiluhöllinni í Egilshöll.

 

Í forkeppninni í kvennaflokki var hörð keppni um efstu sætin og þegar henni lauk var Bára Ágústsdóttir KFR í efsta sæti, Vilborg Lúðvíksdóttir ÍA í 2. sæti og Hafdís Pála Jónasdóttir KFR í 3. sæti. Þegar kom í milliriðilinn náði Vilborg öruggri forystu í efsta sætinu og hélt henni þangað til keppni í undanúrslitum lauk. Sigurlaug Jakobsdóttir ÍR var þá í 2. sæti og Hafdís Pála í 3. sæti. Í undanúrslitunum spilaði Vilborg mjög vel eða 931 án forgjafar og vann fjóra leiki af fimm og endaði með 2.454 pinna í 1. sæti. Hún hafði 150 pinna forskot á Hafdísi Pálu Jónasdóttur sem tryggði sér 2. sætið og sæti í úrslitunum, með 907 án forgjafar og sigur í fjórum leikjum af fimm og endaði með 2.383 pinna. Ragna Matthíasdóttir KFR vann sig upp úr 5. sæti í 3. sætið með 909 án forgjafar og sigur í þremur leikjum og endaði með 2.353 pinna alls.

Í úrslitunum tryggði Hafdís Pála sér sigurinn í fyrsta leiknum með 244 með forgjöf (215 + 29) á móti 208 hjá Vilborgu (168 + 40). Annar leikinn vann Hafdís Pála einnig með stórleik 234 með forgjöf (205 + 29) en Vilborg spilaði 172 með forgjöf (132 + 40). Þar sem Hafdís Pála hafði verið í 2. sætinu að loknum undanúrslitum þurfti hún að vinna 3 leiki til að tryggja sér titilinn og við fengum spennandi keppni í þriðja leik þar sem Vilborg sýndi mikla baráttu. Leikurinn fór þó þannig að Hafdísi Pálu vann leikinn með 5 pinnum eða með 208 með forgjöf (179 + 29) á móti 203 með forgjöf (163 + 40) hjá Vilborgu.

Sjá leiki í undanúrslitum og úrslitum í kvennaflokki

 

Kristófer John Unnsteinsson ÍR tryggði sér efsta sætið í karlaflokki á fyrri degi forkeppninnar og hélt öruggri forystu allt til loka keppninnar með góðri spilamennsku. Baldur Hauksson ÍFH var einnig í 2. sæti frá upphafi forkeppninnar allt þar til kom að keppni í undanúrslitum þar sem hann féll á tíma niður í 3. sæti en tókst að vinna það upp á endasprettinum. Í undanúrslitunum spilaði Kristófer 883 án forgjafar og vann fjóra leiki af fimm og endaði með 2.634 pinna og 219 pinna forskot á næsta mann. Andri Freyr Jónsson KFR var í harðri keppni allt kvöldið, spilaði 863 án forgjafar tókst á endanum að tryggja sér um 3. sætið með 2.499 pinna.

Í úrslitunum var Kristófer öryggið uppmálað og tryggði sér titilinn með góðri spilamennsku. Hann vann fyrsta leikinn með 239 með forgjöf (210 + 29) á móti 188 með forgjöf hjá Baldri (116 + 72). Og annan leikinn vann hann með 251 með forgjöf (222 + 29) á móti (139 + 72) hjá Baldri.

Sjá leiki í undanúrslitum og úrslitum í karlaflokki

 

Nýjustu fréttirnar