Ísland keppir á HM öldunga 50+

Jóhann Ágúst Jóhannsson
Mót World Bowling

Í dag hefst keppni á Heimsmeistaramóti öldunga – 50+ en keppni fer fram á South Point hótelinu í Las Vegas Bandaríkjunum. Ísland sendir fjóra keppendur á mótið en það eru þau Guðný Gunnarsdóttir, Linda Hrönn Magnúsdóttir, Guðmundur Sigurðsson og Þórarinn Már Þorbjörnsson. Þjálfari og fararstjóri er Jóhann Ágúst Jóhannsson. Keppni hefst í dag með því að liðin fá æfingu í salnum í olíuburðinum sem verður í mótinu en hann er WB Tokyo 42 fet. Á morgun miðvikudag hefst einstaklingskeppin og byrja karlarnir mótið en konurnar hefja keppni á fimmtudag kl. 9 að staðartíma eða kl. 16 að íslenskum tíma, 7 tíma mismunur er á Las Vegas og Íslandi. Ekki er enn ljós í hvorum riðlinum Guðmundur og Þórarinn leika en sá fyrri er kl. 9 en sá seinni kl. 13:30 að staðartíma.

Hægt er að fylgjast með keppninni á vefsíðu mótsins. Þar má sjá úrslit, lifandi skor sem og beina útsendingu á vefnum.

Mótinu lýkur svo mánudaginn 9. september.

Opna Reykjavíkurmótið í keilu 2019

Svavar Þór Einarsson
Uncategorized

Opna Reykjavíkurmótið í keilu 2019
Verða haldin 7 & 14.sept
með forgjöf 2019 verður laugardaginn 7.Sept og hefst kl. 11:00.
Án forgjafar verður laugardaginn 14.sept kl 11:00

Mótið fer þannig fram að leikin er ein 6 leikja sería, skipt um brautarpar eftir hvern leik. Að lokinni seríunni far 5 efstu í SteppLadder úrslitakeppni þar sem 5. sætið keppir við 4. og þarf að vinna einn leik til að komast áfram.

Forgjöf reiknast sem 80% af mismur meðaltals og meðaltalshæsta þátttakenda.

Þó aldrei hærri en 64 pinnar.

Ekki verður hægt að spila hærri leik en 300 með forgjöf

Sigurvegarinn verður því Reykjavíkurmeistari í keilu 2019 með forgjöf.

Verð í mótið er aðeins 6.000,- ATH að það er ekki posi á staðnum

Skráning stendur yfir til kl. 22:00 fimmtudaginn 5. sept. fyrir forgjafarmótið skráning hér
og til kl 22:00 fimmtudaginn 12.sept fyrir án forgjafar skráning hér

Olíuburður verður sá sami og í deild

HM kvenna að hefjast í Las Vegas

Jóhann Ágúst Jóhannsson
Uncategorized

HM kvenna hefst í keilusalnum á South Point Hotel í Las Vegas á fimmtudaginn kemur eða þann 22. ágúst og stendur það yfir til föstudagsins 30 ágúst. Að þessu sinni ákvað Keilusambandið að senda ekki lið til leiks á mótinu vegna uppbyggingar A liðs kvenna og vegna mikils kostnaðar við þetta mót. HM kvenna mun standa yfir til 30. ágúst. Í framhaldinu verður Alheimsþing keilusambanda haldið á sama stað þann 1. september og í beinu framhaldi verður svo HM öldunga 50+ frá 2. september til 10. Munu 4 íslenskir keppendur taka þátt í því móti, nánar um það síðar.

Á HM kvenna keppa að þessu sinni 179 keilarar. Meðal þekktra nafna eru þær bandarísku Danielle McEwan sem kom hingað til lands fyrr á árinu og keppti á RIG leikunum og Shannon O‘Keefe. Þær stöllur eru í efstu sætum á PWBA mótaröðinni í ár og vann Danielle US Open fyrir stuttu síðan, einn risatitla í kvennkeilunni vestan hafs. Wegner systurnar Casja og Jenny mæta á mótið fyrir hönd Svía en þær eru meðal sterkustu evrópsku kvennkeilara í dag. Einnig keppir hin danska Mai Ginge Jensen en hún sigraði á Evrópumóti landsmeistara 2018 og er því núverandi Evrópumeistari kvenna en næsta mót mun fara fram í Tyrklandi í nóvember n.k.

Allar upplýsingar um HM kvenna má finna á vefsíðu mótsins. Þar eru stöðufærslur, vísanir í lifandi útsendingar og fleira.

Fjölgun liða í 1. deild kvenna

Jóhann Ágúst Jóhannsson
Íslandsmót liða, Mótanefnd

Á komandi keppnistímabili mun kvennaliðum á Íslandsmóti liða fjölga sem er mikið gleðiefni fyrir keiluna. Tvö ný lið bætast við í deildarkeppnina og af þeim sökum ákvað stjórn KLÍ að fjölga liðum í 1. deild kvenna á komandi tímabili til að jafna fjölda liða í deildum. Verða kvennadeildirnar báðar skipaðar 8 liðum og því verða umferðirnar þrjár í hvorri deild skv. reglugerð. Einnig ákvað stjórn að taka þá upp fyrra fyrirkomulag í úrslitakeppni 1. deildar kvenna þannig að 4 efstu lið, að lokinni deildarkeppni, keppa til úrslita um Íslandsmeistaratitilinn. Stjórn KLÍ samþykkti á stjórnarfundi í gær breytingu á Reglugerð um Íslandmót liða í þá veru. Verður reglugerðin uppfærð á vefnum von bráðar.

Þau lið sem fá sæti í 1. deild kvenna verða því lið ÍR BK, sem féll úr deildinni á síðasta tímabili, og KFR Skutlurnar sem varð í 2. sæti í 2. deild og keppti við KFR Afturgöngurnar um laust sæti í 1. deild.

Dagskrá komandi vetrar verður birt á næstu dögum en gert er ráð fyrir óbreyttum keppnistíma deilda í vetur.

Arnar Davíð sigraði í Munchen

Jóhann Ágúst Jóhannsson
Árangur keilara, Evróputúrinn

Arnar Davíð Jónsson keilari úr KFR sigraði í dag á Track Open sem fram fór í Munchen í Þýskalandi. Mótið er hluti af Evróputúrnum og er þetta í annað sinn sem Arnar sigrar á móti á túrnum en hann vann mót í Óðinsvéum í september í fyrra.

Arnar sem býr í Svíþjóð og spilar með Höganas BC spilaði mjög vel í dag og náði forystunni í mótinu þegar 2 leikir voru eftir. Hann leit aldrei til baka eftir það og kláraði mótið með stæl.

Með sigrinum fór Arnar aftur á toppinn á stigalista Evróputúrsins en hann hafði fallið niður í 2. sæti eftir að hafa verið efstur í nokkrar vikur. Næsta mót fer fram í Óðinsvéum í Danmörku 25. ágúst til 1. september. Arnar á góðar minningar frá því móti og er til alls líklegur á mótaröðinni í ár.

Myndir / images: StreamForceBowling

Nýr íþróttastjóri Keilusambandsins – Kristján Ó Davíðsson

Jóhann Ágúst Jóhannsson
Skrifstofa KLÍ

Stjórn KLÍ hefur ráðið Kristján Ó Davíðsson sem íþróttastjóra KLÍ en eins og kunnugt er sagði Theódóra (Dóra) upp störfum sem íþróttastjóri á vormánuðum. Kristján er 32. ára Hafnfirðingur, mikill Haukamaður og starfar hann m.a. sem formaður Karatedeildar Hauka í dag en Kristján hefur verið virkur í Karate deildinni þar frá 2002. Einnig er hann formaður dómaranefndar Karatesambands Íslands svo þarna er á ferð einstaklingur sem gjör þekkir íþróttasamfélagið. Kristján er kvæntur og eiga þau 2 börn.

Um leið og stjórn KLÍ fagnar komu Kristjáns til liðs við keiluna þakkar hún sömuleiðis Dóru fyrir afskaplega vel unnin störf sem fyrsti Íþróttastjóri sambandsins. Hún hefur nú mótað og rutt enn eina brautina fyrir keilu á Íslandi en lætur staðar numið að sinni. Dóra mun þó að sjálfsögðu aðstoða nýjan Íþróttastjóra KLÍ að fóta sig í starfi. Færir stjórn KLÍ henni miklar þakkir fyrir hennar störf.

Kristján mun hefja störf í byrjun ágústmánaðar og mun m.a. verða með viðveru á skrifstofu KLÍ.

Velkominn til starfa.

Samþykktir Íþróttaþings ÍSÍ 2019 – Bréf frá forseta og framkvæmdastjóra ÍSÍ

Jóhann Ágúst Jóhannsson
ÍSÍ

Á Íþróttaþingi ÍSÍ í maí s.l. voru samþykktar ýmsar áskoranir til íþróttahreyfingarinnar er varða hagsmunamál hennar sem og varðandi samfélagsleg málefni. Það er hvatt til þess af forseta og framkvæmdastjóra ÍSÍ að íþróttahreyfingin kynni sér þessi mál, sjá bréfið frá forseta og framkvæmdastjóra ÍSÍ sem og sjá yfirlit yfir þau mál sem samþykkt voru. Sérstök athygli er vakin á eftirfarandi þingskjölum en innihald þeirra beinist að allri íþróttahreyfingunni:

  • Þingskjal nr. 6 – Stefna ÍSÍ um þjálfaramenntun
  • Þingskjal nr. 7 – Áskorun um jafnréttismál
  • Þingskjal nr. 8 – Áskorun um baráttu gegn öllu ofbeldi
  • Þingskjal nr. 9 – Áskorun gegn rafrettum
  • Þingskjal nr. 10 – Áskorun gegn hagræðingu úrslita og lyfjamisnotkun í íþróttum
  • Þingskjali nr. 21 – Afreksstefna ÍSÍ

Guðný Gunnarsdóttir og Linda Hrönn Magnúsdóttir í 2. sæti á ESBC í Bologna Ítalíu

Jóhann Ágúst Jóhannsson
Önnur erlend einstaklingsmót

Þær stöllur úr ÍR TT Guðný Gunnarsdóttir og Linda Hrönn Magnúsdóttir enduðu í 2. sæti í tvímenningi á 28. ESBC mótinu sem fram fer í Bologna á Ítalíu. Spiluðu þær 6 leikja seríuna með 2.138

eða 178,2 í meðaltal. Þær Helga Sigurðardóttir og Bára áGústadóttir enduðu í 32. sæti í sínum flokki með 1.911 pinna eða 159,3 í meðaltal. Upplýsingar um mótið má finna á vefsíðu þess.

EM öldunga í Bologna Ítalíu er hafið

Jóhann Ágúst Jóhannsson
Mót ETBF

Þessa dagana stendur yfir Evrópumót öldunga 50+ ESBC en mótið fer fram í Bologna Ítalíu. Fyrir Íslands hönd keppa á mótinu þau Bára Ágústsdóttir, Guðný Gunnarsdóttir, Helga Sigurðardóttir, Linda Hrönn Magnúsdóttir og Þórarinn Már Þorbjörnsson. Mótið stendur yfir til laugardagsins 29. júní.

Í einstaklingskeppninni spilaði konurnar 6 leikjaseríuna eftirfarandi:

Guðný Gunnarsdóttir ÍR 1.058 eða 176,3 meðaltal (mtl.)

Helga Sigurðardóttir KFR 1.056 eða 176,0 mtl.

Linda Hrönn Magnúsdóttir ÍR 1.033 eða 172,17 mtl.

Bára Ágústsdóttir ÍR 868 eða 144,7 mtl.

Allar upplýsingar um mótið má finna á vefsíðu þess.

Liðskeppnum lokið á EMC 2019 – Andrés Páll keppir í Masters

Jóhann Ágúst Jóhannsson
Mót ETBF

Núna er liðskeppnum lokið á EM karlalandsliða EMC 2019 en keppt er í Munchen Þýskalandi. Rétt í þessu lauk keppni 5 manna liða og endaði íslenska liðið í 13. sæti af 31. Á morgun hefst keppni 24 meðaltalshæstu leikmanna mótsins og náði Andrés Páll Júlíusson ÍR 22. sætinu af alls 187 keppendum. Arnar Davíð Jónsson, sem á tíma var einnig meðal 24 efstu, seig aðeins niður töfluna síðustu daga og endaði í 29. sæti með 4.843 pinna eftir 24 leiki og vantaði aðeins 30 pinna til að halda sér uppi meðal 24 efstu. Masterskeppnin hefst á morgun kl. 7 að íslenskum tíma og er streymt frá henni beint á YouTube rás Stream Force 4 Bowling. Allar aðrar upplýsingar um mótið má finna á vefsíðu þess.

Árangur Íslands á mótinu var þessi:

Einstaklingskeppni – Frysta keppni mótsins

26. sæti Arnar Davíð Jónsson KFR /Höganas

49. sæti Andrés Páll Júlíusson ÍR

50. sæti Jón Ingi Ragnarsson KFR/BK Brio

72. sæti Gústaf Smári Björnsson KFR

120. sæti Einar Már Björnsson ÍR

125. sæti Gunnar Þór Ásgeirsson ÍR

Tvímenningur

6. sæti Ísland 3 Arnar Davíð og Jón Ingi

45. sæti Ísland 2 Andrés Páll og Gústaf Smári

49. sæti Ísland 1 Einar Már og Gunnar Þór

Þrímenningur

20. sæti Ísland 2 Arnar Davíð, Andrés Páll og Jón Ingi

24. sæti Ísland 1 Einar Már, Gunnar Þór og Gústaf Smári

Liðakeppni 5 manna

13. sæti Arnar Davíð, Andrés Páll, Gunnar Þór, Einar Már og Jón Ingi

All Events

22. sæti Andrés Páll Júlíusson

29. sæti Arnar Davíð Jónsson

59. sæti Jón Ingi Ragnarsson

92. sæti Gústaf Smári Björnsson

100. sæti Gunnar Þór Ásgeirsson

113. sæti Einar Már Björnsson