Hefur þú/þið áhuga á að taka þátt í skemmtilegri keppni í vetur?
Keilusamband Íslands mun í vetur standa fyrir liðakeppni í keilu „utan deilda“ eins og undanfarin fjögur ár og fer keppnin fram í keilusalnum Keilu í Mjódd. Er þetta tilvalið tækifæri fyrir vinnufélaga, vinahópa, saumaklúbba, spilaklúbba, veiðifélaga og aðra að vera með í skemmtilegri keppni einu sinni í mánuði yfir veturinn.

Eftirfarandi eru helstu upplýsingar um keppnisfyrirkomulag og annað er máli skiptir:
Keppnisfyrirkomulag: Keppnistímabilið er frá október 2005 og fram í apríl 2006 og er keppt einu sinni í mánuði á fimmtudögum og hefst keppni kl. 18:30. Keppt verður í 3ja manna liðum og spilaðir 3 leikir og tekur keppnin um 2 klst. í hverri umferð. Að lokinni riðlakeppni komast tvö efstu liðin úr hverjum riðli áfram í úrslitakeppni.

Þátttaka: Reglur eru einfaldar og rétt til þátttöku hafa allir sem áhuga hafa og geta myndað 3 manna lið og þurfa liðsmenn ekki að vera skráðir í keilufélag. Engin takmörk eru á fjölda leikmanna sem er skráðir eru í deildarkeppni á vegum KLÍ. Hægt er að skipta um alla leikmenn liðs á milli leikja.

Skor og stigagjöf: Veitt eru 2 stig fyrir sigur liðs í hverjum leik, 2 stig fyrir hærra heildarskor liðs í umferð og 1 stig fyrir jafnt skor í leik eða umferð, þannig að í hverri viðureign getur lið mest fengið 8 stig. Skráð er skor leikmanna og liðs í hverjum leik og reiknað út meðaltal leikmanna og liðs eftir hverja umferð.

Forgjöf: Leikið er með forgjöf sem leggst við skor keppanda í hverjum leik. Þetta er gert til að jafna mun á milli keppniskeilara og áhugamanna, karla og kvenna.

Þátttökugjald og brautarleiga: Þátttökugjald í utandeildinni er kr. 10.000 fyrir hvert lið ef greitt er fyrir 1. nóvember. Brautarleiga til keilusalarins er kr. 3.300 fyrir liðið hver umferð. Sjá nánari upplýsingar um utandeildina og reglur á heimasíðu Keilusambands Íslands www.kli.is

Skráningarfrestur í keppnina er til og með 22. september 2005. Þann 22. september verður haldin kynning á deildinni í Keilu í Mjódd. Húsið verður opið frá kl. 18:30 til 21:00. Þar verður boðið upp á kennslu í keilu ásamt því að tekið verður á móti skráningum í deildina. Þegar lið er skráð þarf að taka fram heiti liðs, nafn, netfang og símanúmer fyrirliða sem er tengiliður við KLÍ og einnig þarf að taka fram á hvern á að stíla reikning vegna þátttökugjalds ef greiðandi er annar en fyrirliði. Skráning og nánari upplýsingar eru hjá Ásgrími Helga Einarssyni starfsmanni KLÍ [email protected] sími 856 0558.  Sjá auglýsingu

ÁHE

Stjórn Keiludeildar ÍR nýtti í dag þann frest sem félagið hafði fengið hjá stjórn KLÍ til þess að skrá inn lið í 1. deild kvenna. ÍR hafði til loka dags í dag til þess að skrá inn lið og mun því ÍR-KK verða með í deildinni. Þetta þýðir að engin yfirseta verður í deildinni í vetur. Búið er að lagfæra fyrstu tvær umferðirnar sem birtar vour hér í frétt í gær og er sú niðurröðun sem fylgdi þeirri frétt rétt.

ÁHE 

Íslandsmót liða hefst mánudaginn 19. september. Þá hefst 1. deild kvenna, 1. deild karla hefst daginn eftir og 2. deild karla miðvikudaginn 21. september. Heildarplan fyrir deildirnar verður gefið út í vikunni en við birtum tvær fyrstu umferðirnar hér.

Magnús Magnússon KR og Sigfríður Sigurðardóttir KFR hafa bæði lokið keppni á Evrópubikarmótinu í Þýskalandi. Bæði stóðu sig mjög vel og voru ekki langt frá því að komast áfram í 8 manna úrslit.
Sigfríður endaði í 12 sæti með 192 í meðaltal og varð aðeins 114 stigum á eftir Önnu Sofie Ardal frá Danmörku sem varð í 8 sæti.
Magnús endaði í 9 sæti með 208 í meðaltal og vantaði aðeins 81 stig til að komast inn í 8 manna úrslitin en í 8 sæti varð Jesper Agerbo frá Danmörku með 211 í meðaltal.

Í dag voru svo 8 manna úrslitin spiluð. Í kvennaflokki sigraði Tanya Petty frá Þýskalandi löndu sína Michaelu Göbel 228-187 og 216-199.
Í karlaflokki sigraði Anders Öhman frá Svíþjóð Thomas Gross frá Austurríki 206-179 og 192-157.

ÁHE

Í dag var annar dagur Evrópubikarsins í Þýskalandi. Magnús Magnússon lék vel í dag, fyrri 6 leikina 1203 og síðari 6 leikina 1280 og er því með 207 í mtl eftir 18 leiki sem setur hann í 8. sæti í heildina. Efstur er Lasse Lintila frá Finlandi með 229 í mtl. Einn 300 leikur leit dagsins ljós í dag, hann spilaði Jose I Estavez frá Spáni.
Sigfríður Sigurðardóttir leik 6 leiki í dag. Leikina lék hún á 188 meðaltali og er því með 193 í meðaltal eftir 18 leiki og er í 10. sæti. Efst hjá konunum er Tanya Patty frá Þýskalandi með 221 í meðaltal.
Árangur okkar fólks er góður það sem af er og vonandi verður áframhaldið á sama veg.

Heimasíða mótsins er http://eci2005.dbu-bowling.de/

ÁHE

Evrópubikar landsmeistara ECI 2005 haldið í borginni Böblingen í Þýskalandi dagana 5. til 11. september 2005.
Keilusamband Íslands sendir að vanda keppendur til þátttöku á Evrópubikar landsmeistara í keilu, en að þessu sinni verður mótið haldið borginni Böblingen í Þýskalandi dagana 5. september til 11. september 2005.
Fulltrúar okkar á mótinu verða Íslandsmeistarar einstaklinga 2005, þau Sigfríður Sigurðardóttir úr KFR og Magnús Magnússon úr KR. Þetta er annað árið í röð sem Sigfríður tekur þátt í þessu mót, en þriðja árið hjá Magnúsi keppir á þessu móti. Þjálfari, fararstjóri og fulltrúi KLÍ er Theódóra Ólafsdóttir.
Mótið verður haldið í keilusalnum Dream Bowl Bowling Centre og er þetta er 22 brauta salur með Brunwick brautum sem settar voru upp í september 2000. Heimasíða keilusalarins er www.dreambowl.de.
Keppnisfyrirkomulag mótsins er þannig að keppt er í einstaklingskeppni þar sem spilaðir eru 6 leikir í senn í fjórum leikjablokkum, alls 24 leikir. Að loknum þessum 24 leikjum komast 8 efstu keppendurnir í karla- og kvennaflokki áfram í úrslit. Sjá nánari upplýsingar í meðfylgjandi dagskrá. Heimasíða mótsins er http://eci2005.dbu-bowling.de
Alls eru 40 karlar og 37 konur skráð til keppni og eru keppendur því 77 talsins.

ÁHE

Haustmótið 2005
Þátttaka er svo sannarlega að aukast í Haustmótinu enda styttist í að keppnistímabilið hefjist.  Nú hafa alls 37 keppendur tekið þátt í mótinu þegar það er hálfnað.  Næstu umferðir í Haustmótinu eru miðvikudaginn 7. september og sunnudaginn 11. september kl. 20:00. Mótið er tilvalið fyrir byrjendur þar sem keppt er í 5 flokkum eftir meðaltali og fáir keppendur eru í neðstu flokkunum.  Sjá nánari upplýsingar um mótið og stöðuna á www.keila.is og í Keilu í Mjódd.

Evrópubikarmót landsmeistara 2005
Þriðjudaginn 6. september eru æfingar og setningarathöfn Evrópubikarmóts landsmeistara 2005 sem fer fram í Böblingen í Þýskalandi dagana 5. – 11. september 2005. Á miðvikudag hefst síðan keppni með 6 fyrstu leikjunum í karlaflokki og 12 leikjum í kvennaflokki. Fulltrúar okkar á mótinu verða Íslandsmeistarar einstaklinga 2005, þau Sigfríður Sigurðardóttir úr KFR og Magnús Magnússon úr KR.  Þetta er annað árið í röð sem Sigfríður tekur þátt í þessu mót, en þriðja árið hjá Magnúsi. Keppnisfyrirkomulag mótsins er þannig að keppt er í einstaklingskeppni þar sem spilaðir eru 6 leikir í senn í fjórum leikjablokkum, alls 24 leikir, og er til skiptis keppt í langri og stuttri olíu. Að loknum þessum 24 leikjum komast 8 efstu keppendurnir í karla- og kvennaflokki áfram í úrslit. Alls eru 40 karlar og 37 konur skráð til keppni og eru keppendur því 77 talsins. Heimasíða mótsins er http://eci2005.dbu-bowling.de

Meistarakeppni KLÍ 2005
Meistarakeppni KLÍ fer fram í Keilu í Mjódd fimmtudaginn 15. september og hefst upphitun kl. 20:00.  Að þessu sinni keppa til úrslita í kvennaflokki Íslands- og bikarmeistararnir KFR-Valkyrjur og lið KFR-Flakkara sem var í öðru sæti Bikarkeppninnar.  Í karlaflokki keppa Íslands- og bikarmeistararnir ÍR-KLS og KFR-Lærlingar sem voru í öðru sæti í Bikarkeppninni.  Búast má við að þetta verði hörkuviðeignir og hvetjum við alla keilara til að koma og fylgjast með keppninni og upphafi tímabilsins.

Íslandsmót liða 2005 – 2006
Keppni í Íslandsmóti liða hefst mánudaginn 19. september n.k. með keppni í 1. deild kvenna, þriðjudaginn 20. september í 1. deild karla og miðvikudaginn 21. september í 2. deild karla. Keppt verður í Keilu í Mjódd kl. 20:00 alla daga, kl. 18:30 á miðvikudögum í Keiluhöllinni í Öskjuhlíð og kl. 13:00 og kl. 16:00 á sunnudögum í Keilusalnum á Akranesi. Verið er að leggja lokahönd á mótaskrá keppnistímabilsins og mun hún verða send félögunum og birt á heimasíðunni www.kli.is innan skamms.

Unglingastarfið
Æfingar fyrir börn og unglinga hefjast í vikunni.  Keilufélag Reykjavíkur verður með æfingar í Keilu í Mjódd á þriðjudögum og fimmtudögum kl. frá kl. 16:30 til 18:00.  Þjálfarar verða Dagný Edda Þórisdóttir og Hafþór Harðarson og yfirþjálfari er Theódóra Ólafsdóttir.  Hægt er að skrá sig hjá KFR í síma 661-9585 eða [email protected].

Æfingar hjá keiludeild ÍR verða í Keilu í Mjódd á mánudögum og fimmtudögum frá kl. 16:00 til 17:00.  Þjálfari er Jón Helgi Bragason og honum til aðstoðar verður Arnar Ólafsson. Skráning í Keilu í Mjódd í síma 587-1222.

Ef þú vilt fá fréttbréf KLÍ til þín í tölvupósti um leið og það er gefið út þá sendu okkur tölvupóst á [email protected], eða skráðu þig hér