Evrópumót karla verður haldið í Vín í Austurríki 30. júní – 10 júlí 2007. Eftirtaldir karlar hafa verið valdir til að keppa fyrir Íslands hönd:
Andrés Páll Júlíusson, KR
Árni Geir Ómarsson, ÍR
Björn Birgisson, KR
Björn Guðgeir Sigurðsson, KR
Hafþór Harðarson, KFR
Róbert Dan Sigurðsson, ÍR
Þeir Arnar Sæbergsson og Árni Geir Ómarsson úr ÍR leiða á Íslandsmótinu í tvímenningi eftir að keppni í tvímenningi er lokið, með 69 pinna forystu, en þeir léku í 8 leikjum 3.673 eða 229,6 að meðaltali. Næstir á eftir þeim koma Jón Ingi Ragnarsson úr KFR og Róbert Dan Sigurðsson úr ÍR, og þar næst Sigfríður Sigurðardóttir úr KFR og Björn G. Sigurðsson úr KR.
Eftir forkeppni voru þeir Stefán Claessen og Steinþór Geirdal Jóhannsson úr ÍR efstir, en þeir gáfu aðeins eftir í milliriðlinum. Þá voru þeir Andrés Páll Júlíusson og Magnús Magnússon í öðru sæti, en Andrés særðist illa á þumli í fyrsta leik milliriðilsins og neyddist til að leika með aðeins tveimur fingrum.
Keppni heldur áfram kl. 19:00 í kvöld, þegar 6 efstu eftir milliriðil leika einfalda umferð, allir við alla. Að þeim loknum leika tveir efstu tvímenningarnir til úrslita.
Klukkan 19:00 hefst keppni í Íslandsmótinu í tvímenningi 2007, en 11 tvímenningar eru skráðir til leiks. Í kvöld fer fram forkeppni þar sem leiknir eru 4 leikir, og strax á eftir milliriðill þar sem 10 efstu tvímenningarnir leika aðra 4 leiki.
Keppni heldur svo áfram annað kvöld þegar 6 efstu tvímenningarnir eftir milliriðil leika allir við alla í undanúrslitum og eru úrslit leikin strax að þeim loknum.
Í var 14. ársþing KLÍ haldið í ÍR heimilinu við Skógarsel. 21 fulltrúi frá sat þingið ásamt stjórn og þingforseta, Hafsteini Pálssyni, sem á sæti í framkvæmdastjórn ÍSÍ. Hann flutti þinginu kveðju frá ÍSÍ og sæmdi Valgeir Guðbjartsson, fráfarandi formann KLÍ, gullmerki ÍSÍ. Valgeir hefur verið formaður KLÍ frá árinu 1999, en hann gaf ekki kost á sér til áframhaldandi formennsku.
Fyrir þinginu lá meðal annars tillaga frá stjórn KLÍ um breytingu á reglugerð um Íslandsmót liða á þann hátt að mæti lið ekki til leiks skuli það lið sem mætir ekki spila leikinn. Nokkrar umræður urðu um hana, en tillagan var felld í atkvæðagreiðslu. Þá samþykkti þingið áskorun til fjölmiðla um að gera jaðaríþróttum betri skil í íþróttafréttum.
Þórhallur Hálfdánarson var sjálfkjörinn nýr formaður KLÍ þar sem aðrir buðu sig ekki fram. Þórhallur var kjörinn í stjórn á síðasta þingi og losnaði því um eitt sæti í stjórn til eins árs. Í framboði til þess voru Valgeir fráfarandi formaður og Einar Jóel Ingólfsson, og var Valgeir kjörinn með 11 atkvæðum gegn 10. Tvö önnur sæti í stjórn voru til kjörs, og gaf Bragi Már Bragason áfram kost á sér, en Guðmundur Sigurðsson gaf ekki kost á sér til áframhaldandi setu. Árni Geir Ómarsson tekur sæti hans, en fleiri gáfu ekki kost á sér en Bragi og Árni Geir.
Í varastjórn gáfu fimm kost á sér í þrjú sæti og voru það þau Laufey Sigurðardóttir, Einar Jóel Ingólfsson og Andrés Páll Júlíusson sem kjörin voru í varastjórn. Theódóra Ólafsdóttir og Þórarinn Már Þorbjörnsson náðu ekki kjöri.
Er þeim sem úr stjórn og varastjórn ganga þakkað fyrir störf sín og nýjir stjórnarmenn boðnir velkomnir.
Eftir æsispennandi úrslitaviðureign á miðvikudagskvöld voru það KFR-Lærlingar sem hömpuðu Íslandsmeistaratitlinum í liðakeppni karla, í þriðju viðureign gegn liði KR-A. Að loknm tveimur viðureignum voru liðin jöfn að stigum með 20 stig hvort, en KR-A voru þó með 350 pinnum hærra skor.
Enn var svo jafnt að stigum að loknum tveimur leikjum á miðvikudagskvöld, 26-26, KR-A með 42ja pinna forskot í heildina og 8 stig eftir í pottinum. Þegar kom að 10. rammanum leit allt út fyrir að KR-ingar myndu landa titlinum, en í síðasta skoti sínu náði Freyr fellu og jafnaði þannig leik Andrés mótherja síns, og næstu tveir í röðum KFR-Lærlinga náðu einnig að siga fram úr sínum mótherjum og næla sér þannig í tvö stig til viðbótar. Niðurstaðan varð að þeir voru þegar upp var staðið 28 pinnum hærri í leiknum en KR-A og nældu þér þannig í tvö dýrmæt stig til viðbótar, þótt KR-A hafi verið 14 pinnum hærri í heildina. Lokaniðurstaðan í viðureigninni því 10,5 stig gegn 9,5 stigum KR-A og því 30,5 gegn 29,5 útúr öllum þremur úrslitaviðureignunum, en hefði orðið jafnt að stigum hefðu það verið KR-A sem hefðu sigrað, þar sem þeir voru með mun hærra heildarskor.
Í kvennaflokki höfðu KFR-Valkyrjur mikla yfirburði gegn ÍR-TT, og leiddu með 30 stigum gegn 10 eftir 2 viðureignir og þurftu því aðeins hálft stig til að tryggja sér sigurinn. Þær gerðu gott betur á miðvikudag, en þær hafa verið á mikilli siglingu undanfarnar viku. Bættu þær nýleg Íslandsmet sín í tveimur og þremur leikjum, 1.773 og 2.614
KFR-Lærlingar: Freyr Bragason, Bjarni Páll Jakobsson, Hafþór Harðarson, Jón Ingi Ragnarsson og Jón Helgi Bragason
KFR-Valkyrjur: Sigfríður Sigurðardóttir, Dagný Edda Þórisdóttir, Magna Ýr Hjálmtýsdóttir, Theódóra Ólafsdóttir, Bára Ágústsdóttir, S. Unnur Vilhjálmsdóttir.
Aftari röð: KFR-Lærlingar: Freyr Bragason, Bjarni Páll Jakobsson, Hafþór Harðarson, Jón Ingi Ragnarsson og Jón Helgi Bragason, fremri röð: KFR-Valkyrjur: Sigfríður Sigurðardóttir, Dagný Edda Þórisdóttir, Magna Ýr Hjálmtýsdóttir, Theódóra Ólafsdóttir, Bára Ágústsdóttir, S. Unnur Vilhjálmsdóttir.
Nú stendur úrslitakeppni Íslandsmóts liða sem hæst, en í kvöld fer fram þriðji og síðasti leikurinn þar sem í kvennaflokki berjast lið KFR-Valkyrja og ÍR-TT, en hjá körlunum eru það KR-A og KFR-Lærlingar sem berjast um Íslandsmeistaratitilinn.
Á mánudag tryggðu KFR-Afturgöngurnar og ÍR-PLS sér 3. sætin.
Á árshátíð KLÍ sem haldin var í Laugardalshöll s.l. laugardagskvöld, voru veitt verðlaun fyrir deildakeppnina, líkt og venja er, en það voru þeir Hörður Ingi Jóhannsson og Valgeir Guðbjartsson formaður KLÍ sem sáu um hana.
Arnar Sæbergsson stóð uppi sem sigurvegari á 100 ára afmælismóti ÍR, þegar hann sigraði Steinþór Geirdal Jóhannsson í úrslitum með 484 pinnum gegn 411. Að launum hlaut Arnar meðal annars ferseðla fyrir tvo á einhvern áfangastaða Icelandair.
Fimm erlendir spilarar eru skráðir til keppni á 100 ára afmælismóti ÍR og Icelandair sem haldið verður í Keiluhöllinni í Öskjuhlíð dagana 3. – 5. maí n.k. Vegleg verðlaun fyrir efstu sætin í mótinu. Verð kr. 3.000 fyrir forkeppni og kr. 4.500 fyrir milliriðli. Skráning er hjá Reyni reynir(hjá)postur.is sími 825 1213. Sjá nánar í auglýsingu
Vegna fjölda áskorana hefur verið tekin sú ákvörðun að nota ekki deildarolíuburð í mótinu. Þess í stað verður notaður olíuburður nr 6 sem er 40 feta olíuburður. Verið er að vinna í því að fá graf af olíuburðinum.
Það var sannkölluð stórskotahríð í Keiluhöllinni í gærkvöldi þegar að leikið var til úrslita í Bikarkeppni liða.
KFR-Valkyrjur tryggðu sér titilinn með hreint út sagt frábærri spilamennsku þegar þær settu Íslandsmet í einum, tveimur og þremur leikjum liða, og unnu þannig ÍR-TT 3-0. Spiluðu þær 922 í fyrsta leik, 1.749 í tveimur og 2.579 í þremur, sem er bæting frá eldra meti um 152 pinna. Það var Sigfríður Sigurðardóttir, sem um helgina setti nýtt Íslandsmet í 3 leikjum kvenna, sem lék þeirra best, 713, og Magna Ýr var næst með 642.
Hjá körlunum áttu ÍR-PLS stórleik, en þeir sigurðu einnig 3-0 félaga sína úr ÍR-KLS, en alls spiluðu þeir 2.738 gegn 2.356 hjá ÍR-KLS. Í öðrum leik lék hinn 19 ára gamli Róbert Dan Sigurðsson sinn fyrsta 300 leik, og liðsfélagar hans vou einnig á skotskónum og samtals spiluðu þeir 1.017 í þeim leik.
