Þeir félagar Robert Andersson og Martin Larsen settu nú fyrir skemmstu Evrópumet í 6 leikjum tvímennings, þegar þeir spiluðu 2.818, eða 234,8 að meðaltali.  Þeir eru efstir eftir forkeppnina, en hinir þrír tvímenningarniar sem fara í undanúrslit eru Tobias Gaebler og Achim Grabowski frá Þýskalandi, Thomas Gross og Thomas Tybl frá Austurríki og danirnir Jesper Agerbo og Bo Winther Pedersen.  Í undanúrslitum leikur 1. sæti við 4. sæti og það 2. við 3., og sigurvegarar þeirra viðureignar leika síðan um titilinn.

Róbert Dan og Björn spiluðu aðeins lægra í dag en í gær, eða 2.177.  Skor má sjá hér að neðan.

Þeir Stefán Claessen og Andrés Páll Júlíus luku í gærkvöld keppni í tvímenningnum, en gengi þeirra var líka og þeirra Hafþórs og Árna Geirs betra í löngum olíuburði en stuttum.  Þeir léku samtals 2.198, eða 183,2 í meðaltal.

Þeir Róbert og Björn hófu keppni núna klukkan 13:30. Sjá skor.

Að neðan má sjá skor þeirra Stefáns og Andrésar.

Þeir Hafþór og Árni Geir luku nú fyrir stundu keppni í tvímenningskeppninni, en þeim gekk mun betur í löngu olíunni en þeirri stuttu í gær.  Þeir léku í dag á 199,5 meðaltali, Hafþór með 1.263 og Árni Geir 1.131.

Austurríkismennirnir, sem léku best í hóp 1 í gær, endurtóku leikinn nú dag og spiluðu 2.719 eða 226,6 að meðaltali, sem er besta sería tvímennings enn sem komið er.  Þeir eru samanlagt með 5.280, eða 220 að meðaltali, sem dugir þeim þó ekki nema í 4. sætið að svo stöddu.

Úrslit eru farin að koma fyrr enn á vef mótsins, en við sendum nú leiki okkar manna um leið og þeim lýkur.

Hér má fylgjast með gengi íslensku strákanna í beinni

Þrímenningur – Ísland 1 – fyrri umferð – 5. júlí kl. 14:30

Björn 166 + 207 + 191 = 564
Róbert 158 + 168 + 178 = 504
Hafþór 198 + 184 + 171 = 553
Samtals 522 + 559 + 540 = 1.621

Skorið hefur farið hækkandi á Evrópumótinu frá því keppni hófst í gærmorgun.   Þeir Róbert Dan Sigurðsson og Björn Sigurðsson léku í síðasta holli fyrri umferðarinnar nú í morgun, og eru í 61. til 62. sæti með 2.208, eða 184 í meðaltal.  Stefán og Andrés eru í 98. sæti og Hafþór og Árni Geir í 100. sæti.

Í efsta sæti eru danirnir Jesper Agerbo og Bo Winther Pedersen, sem léku nú í morgun, með 2.713 eða 226 að meðltali.  Þar á eftir koma svíarnir Magnus Andersson og Tobias Karlsson sem léku í gærkvöld með 2.682, en Tobias lék manna best í fyrri umferðinni og leiðir því einstaklingskeppnina, en hann spilað 1.458.  Í þriðja sæti eru Tobias Gaebler og Achim Grabowski frá Þýskalandi, og því fjórða þeir Robert Andersson og Martin Larsen sem eru okkur Íslendingum vel kunnugir, með 2.632.

Klukkan 13:30 heldur keppni áfram í langri olíu, þar sem Árni Geir og Hafþór spila, og klukkan 18:00 leika þeir Stefán og Andrés síðari seríu sína í tvímenningnum.  Róbert og Björn hvíla til morguns, þegar þeir leika klukkan 13:30.

Íslenska liðið að lokinni setningarathöfninni

Hörður Ingi í morgun

Þeir Haþór Harðarson og Árni Geir Ómarsson hófu keppni í tvímenning nú í morgun. Skorið var ekki hátt í stutta olíuburðinum í morgun, en efstir að loknum fyrsta hópnum eru heimamennirnir Thomas Gross og Thomas Tybl með 213,41 í meðaltal.  Hafþór og Árni Geir byrjuðu ágætlega en misstu dampinn og enduðu með 1.955, eða 163 í meðaltal.  Einhver vandræði eru á tölvukerfinu og því ekki hægt að nálgast skor einstakra leikja á vef mótsins, en unnið ku vera að lagfæringu á því.
Leiktímar okkar manna í tvímenningskeppninni eru eftirfarandi:

• Hafþór og Árni Geir – hópur 1 – mánudag 9:00 og þriðjudag 13:30
• Stefán og Andrés Páll – hópur 2 – mánudag 13:30 og þriðjudag 18:00
• Róbert Dan og Björn – hópur 4 – þriðjudag 9:00 og miðvikudag 13:30

Leikið er í stuttum olíuburði í fyrra skiptið, og löngum í þeim síðari.

Tvímenningskeppni á Evrópumóti karla hefst á morgun, mánudag, og stendur til miðvikudags.  Leiknir eru tvisvar sinnum sex leikir, fyrra skiptið í stuttum olíuburði, 35 fet, og það síðara í löngum, 45 fet.  Vegna fjölda þjóða er leikið í fjórum hollum og leika þrjú á dag.

Tilkynnt hefur verið hvaða tvímenningum verður teflt fram fyrir Íslands hönd, og eru þeir eftirfarandi:

• Hafþór Harðarson og Árni Geir Ómarsson
• Stefán Claessen og Andrés Páll Júlíusson
• Róbert Dan Sigurðsson og Björn Sigurðsson

Ekki hefur verið tilkynnt í hvaða hollum hvaða tvímenningar leika.

Í gær hélt íslenska karlalandsliðið til Vínar, þar sem Evrópumót karla fer fram dagana 30. júní til 10. júlí.  Liðið skipa þeir Andrés Páll Júlíusson og Björn Guðgeir Sigurðsson úr KR, Hafþór Harðarson úr KFR og Árni Geir Ómarsson, Róbert Dan Sigurðsson og Stefán Claessen úr ÍR, en Stefán tók sæti Björns Birgissonar sem á við meiðsli á öxl að stríða.  Með hópnum eru þeir Hörður Ingi Jóhannson þjálfari og Þórhallur Hálfdánarson.

Liðið kannaði aðstæður í keilusalnum í dag og tók æfingu, en á morgun verður hin opinbera æfing með endanlegum olíuburði og setningarathöfn.  Keppt er í tvímenningi mánudag til miðvikudag, þrímenningi fimmtudag og föstudag, og liðakeppni fer fram um helgina.  Mánudaginn 9. júlí eru svo úrslit einstaklinga úr samanlögðu skori úr hinum keppnunum.

Magnús Magnússon sigraði forkeppni Brunswick Aalborg International en forkeppni í mótinu lauk núna í kvöld.  Magnús spilað stórglæsilega 6 leikja seríu 1514.  Annar var Paul Moor frá Bretlandi með 1512 og þriðji var finnski atvinnumaðurinn Mika Koivuniemi með 1499.  Þessi árángur Magnúsar tryggir honum sæti í þriðja hluta úrslitakeppni mótsins sem hefst í fyrramálið og lágmark 24. sæti í lokastöðu mótsins.  Magnús fékk einnig 1000€ verðlaunafé fyrir sigurinn.

Stefán Claessen endaði í 79. sæti með 1272 og Hafþór Harðarson var í 98. sæti með 1249.  Bowlersjournal heldur áfram að fylgjast með mótinu á morgun á slóðinni http://www.bowlersjournal.com/tournaments/2007aalborg/index.htm

Magnús Magnússon Íslandsmeistarinn úr KR er að vekja mikla eftirtekt í Evrópska keiluheiminum þessa dagana með frábærri spilamennsku í Álaborg.

Magnús er staddur í Álaborg ásamt þeim Stefáni Classen og Hafþóri Harðarsyni að spila á Brunswick Aalborg International.  Magnús spilaði í sínum fyrsta riðli á miðvikudagskvöldið og byrjaði með látum eða 245 leik, næsti leikur hans var örlítið lægri eða 229 og sá þriðji 236 eða 710 í seríu.  Í fjórða leik mætti segja að Magnús hafi sett í sprengigírinn því þá kom 257, 268 og 279 eða 804 í seríu.  Heildarskor Magnúsar er því 1514 og er hann enn efstur í mótinu þrátt fyrir mikið af verulega sterkum spilurum þar með talda atvinnumennina Sean Rash og Mika Kouvuniemi.  Stefán er í 69. sæti með 1272, hæsti leikur 290 og Hafþór er í 86. sæti með 1249 og hæsta leik 269

Forkeppni mótsins lýkur annað kvöld með Desperado Squad en nokkuð ljóst má vera að þessi árangur Magnúsar í forkeppninni tryggir honum eitt af topp 24 sætunum í mótinu og lágmark 900€ í verðlaunafé.  Netmiðill Bowlers Journal heldur uppi mjög góðri og skemmtilegri fréttaveitu frá mótinu sem er uppfærð eftir hvern riðil og er greinilegt að þeim kemur mikið á óvart frammistaða þessa Íslendins.  Fréttirnar má skoða hér.