Keilusamband Íslands hefur valið Guðnýju Gunnarsdóttur og Hafþór Harðarson úr ÍR sem íþróttakonu og íþróttamann ársins 2013 í keilu.

Þetta er í fyrsta sinn sem Guðný hlýtur þennan titil, en þriðja árið í röð og í fjórða skiptið alls sem Hafþór hlýtur útnefninguna. Sjá upplýsingar um stig til Keilara ársins 2013

Laugardaginn 28. desember nk. fer fram hóf ÍSÍ og Samtaka íþróttafréttamanna þar sem Íþróttamaður ársins 2013 verður kjörinn og verða þá jafnframt veittar viðurkenningar til íþróttakvenna og íþróttamanna ársins 2013 í sérgreinum íþrótta innan ÍSÍ. Verður þetta í nítjánda sinn sem þessir aðilar standa að sameiginlegri hátíð fyrir íþróttafólk og íþróttaforystu með stuðningi Ólympíufjölskyldu ÍSÍ. Sjá frétt

Keppni í 3. umferð Íslandsmóts unglingaliða fór fram í Keiluhöllinni í Öskjuhlíð í gær, laugardaginn 7. desember. Arnar Daði Sigurðsson í ÍA-1 spilaði best allra í þessari umferð og hæsti leikur hans var 190.  Lið ÍA-1 vann alla leiki liðsins í þessari umferð og hefur aukið forystu sína á toppnum með 22 stig, ÍR-1 er í 2. sæti með 17 stig, KFR-1 er í 3. sæti með 14 stig. Sjá stöðuna og skor umferðar

Á Íslandsmóti unglingaliða eru spilaðar 5. umferðir á keppnistímabilinu og síðan keppa fjögur efstu liðin til úrslita. Keppt er í þriggja manna liðum og þátttökurétt hafa unglingar sem eru félagar í keilufélagi og eru í 5. – 10. bekk grunnskóla. Að þessu sinni eru fimm lið skráð til leiks, tvö lið frá ÍA, tvö lið frá ÍR og eitt lið frá KFR. Í hverri umferð er spiluð einföld umferð allir við alla, eða 4 leikir. Sjá nánar um Íslandsmót unglingaliða og dagskrá unglingamóta í vetur.

Jólamót Keiludeildar ÍR og Nettó verður haldið í Keiluhöllinni í Öskjuhlíð helgina 14. og 15. desember n.k. og hefst keppni í riðlum kl. 9:00 og 10:30 báða dagana. Keppnin er einstaklingskeppni í fimm flokkum og veitt eru vegleg verðlaun fyrir þrjú efstu sætin í hverjum flokki. Einnig verður hið geysivinsæla happdrætti. Spiluð er 3 leikja sería og er hægt að spila aftur og gildir þá hæsta sería. Verð er kr. 3.000 fyrir fyrstu seríuna og 2.500 kr. fyrir hverja seríu eftir það. Skráning í mótið er á netinu og hægt er að velja um fjóra riðla laugardag og sunnudag kl. 9:00 og 10:30. Olíuburður í mótinu er Beaten Path 41ft. Sjá nánar í auglýsingu.

Hafþór Harðarson ÍR keppni nú á 13th Quatar Open mótinu sem fer fram í borginni Doha í Quatar. Mótið er 19. mót ársins á Evrópsku mótaröðinni og einnig samþykkt af heimssambandinu WTBA og keppa þar margir af fremstu keilurum í heiminum í dag. Þegar keppni er lokið í 12 hollum af 17 er Hafþór í 71. sæti af 117 keppendum en 34. keppendur komast áfram í næstu umferð. Sjá heimasíðu mótsins

Í framhaldinu mun Hafþór fara til Svíþjóðar eftir áramótin og keppa á AIK International Tournament 2014 sem fer fram í Stokkhólmi 26. desember – 6. janúar 2014. Arnar Davíð Jónsson úr KFR mun einnig keppa á mótinu.

Sjá heimasíðu mótsins

Í tilefni af Alþjóðadegi sjálfboðaliðans í dag, 5. desember 2013, vill Íþrótta- og Ólympíusamband Íslands nota tækifærið og þakka öllum sjálfboðaliðum innan hreyfingarinnar fyrir sitt framlag í þágu íþrótta.  Starfsemi íþróttahreyfingarinnar byggist á stórum hluta á vinnu sjálfboðaliða. Fjöldi fólks hefur lagt íþróttahreyfingunni lið með því að sitja í nefndum, ráðum eða vinnuhópum, tekið þátt í foreldrastarfi eða aðstoðað við framkvæmd móta eða kappleikja.

Nýverið var tekinn í notkun sjálfboðaliðavefurinn „Allir sem einn“. Megin markmiðið með vefnum er að skapa vettvang fyrir sjálfboðaliða til þess að halda utan um sitt framlag hvort sem það er unnið í þágu íþróttahéraða, sérsambanda, félagsliða eða ÍSÍ. Einnig er markmiðið að fá yfirsýn yfir það fjölbreytta starf sem sjálfboðaliðar vinna innan íþróttahreyfingarinnar. Sjá kynningu á vefnum og fréttatilkynningu frá ÍSÍ

Við hvetjum alla til þess að fara inn á  „Allir sem einn“ og skrá inn sitt vinnuframlag. Með því móti náum við að gera störf sjálfboðaliða innan íþróttahreyfingarinnar sýnilegri.

Þriðja umferðin á Íslandsmót unglingaliða fer fram í Keiluhöllinni Öskjuhlið laugardaginn 7. desember n.k. og hefst keppni kl. 9:00.

Staðan er nú þannig að lið ÍA 1 hefur tekið forystu og er í 1. sæti með 14 stig, ÍR 1 er í 2. sæti með 11 stig, KFR 1 er í 3. sæti með 10 stig. Sjá stöðuna og skor umferðar

Á Íslandsmóti unglingaliða eru spilaðar 5. umferðir á keppnistímabilinu og síðan keppa fjögur efstu liðin til úrslita. Keppt er í þriggja manna liðum og þátttökurétt hafa unglingar sem eru félagar í keilufélagi og eru í 5. – 10. bekk grunnskóla. Að þessu sinni eru fimm lið skráð til leiks, tvö lið frá ÍA, tvö lið frá ÍR og eitt lið frá KFR. Í hverri umferð er spiluð einföld umferð allir við alla, eða 4 leikir. Sjá nánar um Íslandsmót unglingaliða og dagskrá unglingamóta í vetur.

Röð efstu liða í 1. deild kvenna er óbreytt eftir 9. umferðina. KFR-Valkyrjur hafa aðeins styrkt stöðu sína á toppnum og eru nú með 125 stig, 3,5 stigi meira en ÍR-TT sem er í 2. sæti með 121,5 stig. KFR-Afturgöngurnar koma síðan í 3. sæti með 112,5 stig og ÍR-Buff er í 4. sæti með 108 stig. Sjá stöðuna eftir 9. umferð

Í 9. umferð sóttu KFR-Afturgöngurnar lið ÍA heim á Skaganum. Afturgöngurnar byrjuðu mun betur en gáfu eftir í síðasta leik og fór viðureign þeirra 5 – 15. Þrír leikir fóru fram í Öskjuhlíð. ÍR-BK tók á móti ÍR-TT, en eftir góða byrjun ÍR-TT snerist leikurinn við og ÍR-BK náði 6 stigum á móti 14. ÍR-N tók á móti KFR-Valkyrjum og þrátt fyrir að Dagný Edda hefði spilað hæsta leik og hæstu seríu vetrarins og Alda Harðardóttir hefði mætt til leiks náði ÍR-N 3 stigum úr viðureigninni. KFR-Skutlurnar áttu góðan dag á móti ÍR-KK og fór leikur þeirra 16 – 4. Í Egilshöllinni tók ÍR-Buff á móti ÍFH-Eldingu og þrátt fyrir góða byrjun hjá ÍR-Buff snerist dæmið við í síðasta leik og viðureignin fór 15 – 5. ÍR-SK sat hjá í þessari umferð.

Úrslit leikja í 9. umferð voru eftirfarandi:
ÍA – KFR-Afturgöngurnar 5 – 15
ÍR-BK – ÍR- TT 6 – 14
ÍR-N – KFR-Valkyrjur 3 – 17
ÍR-KK – KFR-Skutlurnar 4 – 16
ÍR-Buff – ÍFH-Elding 15 – 5

Eins og áður sagði átti Dagný Edda Þórisdóttir stórleik í umferðinni og spilaði hæsta leik vetrarins 267 og hæstu seríu vetrarins 720. KFR-Valkyrjur spiluðu einnig hæstu seríu umferðarinnar og vetrarins með 2.263.  Helga Sigurðardóttir KFR-Afturgöngunum spilaði 567 seríu og Linda Hrönn Magnúsdóttir ÍR-TT spilaði 560 seríu.

Staðan í 1. deild kvenna að lokinni 9. umferð:
1. KFR-Valkyrjur 125 (8)
2. ÍR-TT 121,5 (8)
3. KFR-Afturgöngurnar 112,5 (8)
4. ÍR-Buff 108 (8)
5. ÍR-BK 89,5 (9)
6. ÍFH-Elding 83,5 (9)
7. ÍR-N 81 (8)
8. KFR-Skutlurnar 65,5 (8)
9. ÍR-KK 53 (8)
10. ÍA 45 (8)
11. ÍR-SK 15,5 (8)
(fjöldi leikja í sviga)

KFR-Valkyrjur eru með hæsta meðaltal liðs 170,67, KFR-Afturgöngurnar eru með 165,80 og ÍR-TT er með 165,10. ÍR-TT á hæsta leik liðs 770, en KFR-Valkyrjur eiga hæstu seríu liðs 2.263.

Dagný Edda Þórisdóttir KFR-Valkyrjum er nú komin með hæsta meðaltal deildarinnar með 189,36 að meðaltali í 22 leikjum. Elín Óskarsdóttir KFR-Valkyrjum er með 187,33 að meðaltali í leik í 15 leikjum og Helga Sigurðardóttir KFR-Afturgöngum er með 178,5 í 24 leikjum. Í keppni um stigameistararann er Elín er með 0,867 í 15 leikjum, Guðný Gunnarsdóttir ÍR-TT er með 0,813 í 24 leikjum og Ásdís Ósk Smáradóttir ÍR-Buff er með 0,800 að meðaltali í 5 leikjum. Dagný Edda er með hæsta fellumeðaltal deildarinnar 4,91 að meðaltali í leik, Elín er með 4,27 og Guðný er með 4,13. Dagný Edda á hæsta leik deildarinnar 267, Ástrós Pétursdóttir ÍR-Buff á 245, Guðný á 234 eins og Helga. Dagný Edda á hæstu seríuna 720, Elín kemur næst með 620 og þriðja er Helga 604 seríu.

Sjá stöðuna eftir 9. umferð

Í 10. umferð sem fer fram þriðjudaginn 10. desember taka KFR-Skutlurnar á móti ÍR-Buff í Öskjuhlíð. Þar mætast einnig KFR-Afturgöngurnar og ÍR-N og ÍR-SK og ÍR-BK. Í Egilshöllinnitaka KFR-Valkyrjur á móti ÍR-KK og ÍR-TT tekur á móti ÍA. ÍFH-Elding situr hjá í 10. umferð.

Í vikunni var leikin 7. umferð í 1. deild karla.  Augu flestra beindust að viðureign ÍR liðanna  PLS og KLS.

ÍA W – KR C  24. nóvember í Keilusalnum Akranesi.
Þessi leikur var spilaður langt á undan öðrum leikjum í þessari umferð.
ÍA W byrjaði leikinn af miklum krafti og unnu 1. leikinn stórt. Eftir það jafnaðist viðureignin og þriðja leikinn vann KR C með 3ja stiga mun.  ÍA W lagði hins vegar grunn að sigri viðureignarinnar í fyrsta leik og lokastaðan var 12 – 8.
Magnús var hæstur hjá ÍA W með 618 en Hörður spilaði 569 hjá KR C.

Þór – ÍA 30. nóvember í Keilunni á Akureyri.
ÍA skellti sér norður fyrir heiðar og mættu heimamönnum í Þór. Um mikinn fallbaráttu slag var að ræða en Þór var í neðsta sætinu fyrir leikinn og ÍA sæti ofar.
Heimamenn buðu ÍA menn velkomna norður en sýndu enga gestrisni.  Þór vann fyrstu tvo leikina nokkuð örugglega en þriðji leikurinn varð spennandi þar sem úrslit réðust alveg í restina.
Viðureignina vann Þór 13 – 7 og náðu þar með ÍA að stigum, bæði lið eru með 45 stig en Þór á leik til góða.
Guðmundarnir spiluðu best hjá sínum liðum, hjá Þór 608 og hjá ÍA 564.

KR B – KFR Lærlingar 2. desember í Öskjuhlíð.
Lærlingar gerðu ekki góða ferð í Öskjuhlíðina þegar þeir mættu KR B.  Fyrstu leikurinn var alveg eign KR en leikur 2 og 3 voru hnífjafnir.  Annan leikinn vann KR með 5 pinnum og  þriðji leikurinn endaði jafn, 738 – 738. Viðureignin endaði hins vegar 13,5 – 6,5 fyrir KR og þar munaði mest um fyrsta leikinn.
Hjá KR var Bragi Már hæstur með 611 en hjá Lærlingum voru Guðlaugur 574 og Sveinn 562 hæstir.

ÍR PLS – ÍR KLS  3. desember  í Egilshöll.
Leikurinn fór fram á brautum 1 og 2.  Fyrstu tveir leikirnir voru jafnir en í þriðja leik tók PLS málin í sýnar hendur, spiluðu 818 á móti 721 frá KLS og lönduðu þægilegum sigri, 14 – 6. 
Hafþór var hæstur hjá PLS með 664 og Einar Már spilaði 615. Hjá KLS var Andrés með 625 og Magnús 612. 
Sigurinn setur PLS í sterka stöðu á toppi deildarinnar, 16 stigum á undan ÍA W sem reyndar á einn leik til góða.

KFR Stormsveitin – KR A 3. desember í Egilshöll.
Hér var um hörku spennandi og jafna viðureign að ræða. Fyrstu tveir leikirnir voru að vísu ekki svo jafnir, KR vann fyrsta leikinn 5 – 1 en Stormsveitin svaraði fyrir sig í öðrum leik og unnu 5 – 1. Staðan því jöfn 6 – 6 fyrir síðasta leikinn.  Sá leikur var jafn allan tímann og úrslitin réðust ekki fyrr en á lokaköstunum. Leikurinn fór 3 – 3 en KR sigraði heildina með 3 pinnum og viðureignina því 11 – 9.
Valgeir var hæstu hjá Stormsveitinni með 651 og Ásgrímur spilaði 594. Hjá KR var Sigurbjörn hæstur með 640.

8  umferð  verður leikin dagana 6. – 10. desember. Einum leik í þeirri umferð er lokið en það er viðureign KFR Stormsveitarinnar á móti Þór. Sá leikur endaði 9 – 11 fyrir Þór en fjallað verður um þann leik um leið og 8. umferðin verður gerð upp. Leikir umferðarinnar eru annars þessir:

ÍA – ÍA W  6. desember kl. 18 á Akranesi
KR A – KFR Lærlingar 10. desember  í Öskjuhlíð
ÍR KLS – KR B 10. desember í Egilshöll
KR C – ÍR PLS 10. desember í Egilshöll.

Stöðu og nánari úrslit má sjá hér.

Opna Reykjavíkurmót unglinga í keilu fer fram í Keiluhöllinni Egilshöll miðvikudaginn 11. og fimmtudaginn 12. desember og hefst keppni kl. 17:00 báða dagana.

Skráning fer fram hjá Dóru í síma 6619585 [email protected] og hjá Herði [email protected] í síma 8944885 og lýkur mánudaginn 9. desember kl. 22:00.

Keppt er í 5 flokkum pilta og stúlkna og spila keppendur í 1. og 2. flokki 6 leiki í forkeppni hvorn dag, en keppendur í 3., 4. og 5. flokki spila 3 leiki í forkeppni hvorn dag. Sjá nánar í auglýsingu

Það eru miklar breytingar á toppnum í 1. deild kvenna á Íslandsmóti liða. Að 8. umferðum loknum hafa KFR-Valkyrjur endurheimt efsta sætið með 108 stig, hálfu stigi meira en ÍR-TT sem eru komnar í 2. sæti með 107,5. KFR-Afturgöngurnar eru komnar í 3. sæti á nýjan leik 97,5 stig og ÍR-Buff er nú í 4. sæti með 93 stig. Sjá stöðuna eftir 8. umferð

Í 8. umferð fóru þrír leikir fram í Öskjuhlíð. ÍFH-Elding vann ÍR-KK með 12,5 stigum gegn 7,5, KFR-Skutlurnar máttu sætta sig við 4,5 stig á móti 15,5 gegn ÍR-N og KFR-Afturgöngurnar tóku 17 stig á móti 3 hjá ÍR-BK. Í Egilshöllinni tóku KFR-Valkyrjur á móti ÍA og tóku 16,5 stig á móti 3,5 og ÍR-TT tók á móti ÍR-SK og tapaði einu stigi 19 – 1. ÍR-Buff sat hjá í þessari umferð.

Úrslit leikja í 8. umferð voru eftirfarandi:
KFR-Skutlurnar – ÍR N 4,5 – 15,5
KFR-Afturgöngurnar – ÍR-BK 17 – 3
KFR-Valkyrjur – ÍA 16,5 – 3,5
ÍR-TT – ÍR-SK 19 – 1
ÍFH-Elding – ÍR-KK 12,5 – 7,5

KFR-Afturgöngurnar voru með hæstu seríu umferðarinnar 2.082. Helga Sigurðardóttir KFR-Afturgöngunum spilaði best með 588 seríu, Dagný Edda Þórisdóttir KFR-Valkyrjum spilaði 570 og Ragna Matthíasdóttir KFR-Afturgöngunum spilaði 533.

Staðan í 1. deild kvenna að lokinni 8. umferð:
1. KFR-Valkyrjur 108 (7)
2. ÍR-TT 107,5 (7)
3. KFR-Afturgöngurnar 97,5 (7)
4. ÍR-Buff 93 (7)
5. ÍR-BK 83,5 (8)
6. ÍFH-Elding 78,5 (8)
7. ÍR-N 78 (7)
8. KFR-Skutlurnar 49,5 (7)
9. ÍR-KK 49 (7)
10. ÍA 40 (7)
11. ÍR-SK 15,5 (8)
(fjöldi leikja í sviga)

KFR-Valkyrjur eru með hæsta meðaltal liðs 168,11, KFR-Afturgöngurnar eru með 165,79 og ÍR-TT er með 164,99. ÍR-TT á hæsta leik liðs 770, en KFR-Afturgöngurnar eiga hæstu seríu liðs 2.125.

Elín Óskarsdóttir KFR-Valkyrjum er með hæsta meðaltal deildarinnar 187,3 að meðaltali í leik í 15 leikjum. Dagný Edda Þórisdóttir KFR-Valkyrjum er með 181,4 að meðaltali í 19 leikjum og Ragna Matthíasdóttir KFR-Afturgöngum er með 178,3 í 18 leikjum. Í keppni um stigameistararann er Elín er með 0,867 í 15 leikjum, Guðný Gunnarsdóttir ÍR-TT er með 0,833 í 21 leik og Ásdís Ósk Smáradóttir ÍR-Buff er með 0,800 að meðaltali í 5 leikjum. Dagný Edda er með hæsta fellumeðaltal deildarinnar 4,47 að meðaltali í leik, Elín er með 4,27 og Guðný er með 4,24. Ástrós Pétursdóttir ÍR-Buff á hæsta leik deildarinnar 245, Guðný á 234 og Helga Sigurðardóttir KFR-Afturgöngunum hefur spilað 231. Elín á hæstu seríuna 620, Helga kemur næst með 604 seríu og þriðja er Guðný með 593 seríu.

Sjá stöðuna eftir 8. umferð

Í 9. umferð tekur ÍA á móti KFR-Afturgöngunum mánudaginn 2. desember, en þriðjudaginn 3. desember tekur ÍR-BK á móti ÍR-TT í Öskjuhlíð, ÍR-N tekur á móti KFR-Valkyrjum og ÍR-KK og KFR-Skutlurnar mætast. Í Egilshöllinni tekur ÍR-Buff á móti ÍFH-Eldingu  ÍR-SK situr hjá í 9. umferð.