33. þing KLÍ 2026

Jóhann Ágúst Jóhannsson
Fundir, Skrifstofa KLÍ

Í dag fór fram 33. þing KLÍ en það var að þessu sinni haldið í boði Íþróttafélags Asparinnar í Sigtúni í Reykjavík. Var vel mætt á þing og alls 23 fulltrúar aðildarfélaga sambandsins skráðir til þing. Þinggerð sem og þingskjöl má finna hér á vef okkar.

Sem fyrr var þingi stýrt röggsamlega af Hafseini Pálssyni frá Framkvæmdastjórn ÍSÍ. Er þetta í 31. sinn sem Hafsteinn stýrir þingi og kann Keilusambandið honum bestu þakkir fyrir röggsama stjórnun nú sem fyrr. Valgerður Rún Benediktsdóttir formaður KLÍ veitti Hafsteini að þessu sinni Gullmerki KLÍ fyrir ómetanlega aðstoð hans í gegn um sögu sambandsins.

Fallnir félagar

Nýlega bárust fréttir þess eðlis að keilusamfélagið sæi á eftir tveimur félögum. Þórður Guðjón Kjartansson lést 22. mars s.l. Þórður rak á sínum tíma Keiluland í Garðabæ og flutti þá starfsemi síðar í Mjódd sem þar var rekið um langt árabil. Keilusamfélagið á Þórði mikið að þakka fyrir uppbyggingu keilunnar á Íslandi.

Þann 24. apríl lést svo Hreinn Rafnar Magnússon liðsmaður ÍR-Keila.is. Hreinn Rafnar æfði keilu með vinnufélögum sínum hjá Icelandair og gekk loks til liðs við deildarlið þrátt fyrir að vera kominn á efri ár. Var gott dæmi um það að við getum alltaf byrjað í keilu, sama hvað við erum gömul.

Bað Valgerður þingheim að rísa úr sætum og minnast fallinna félaga sem hvor fyrir sig lagði mark sitt á sögu okkar.

Hefðbundin þingstörf

Þingið hélt áfram með hefðbundnum störfum, skýrsla stjórnar, reikningar sambandsins og fjárhagsáætlun voru fram lögð og umræður sköpuðust um þau mál.

Á þingi var samkvæmt venju veitt Afreksmerki KLÍ sem er gert þegar íslenskir keppendur vinna til verðlauna á stórmótum erlendis.

Fyrst voru þær Jóna Gunnarsdóttir KFR, Bára Ágústsdóttir ÍR, Guðný Gunnarsdóttir ÍR og Linda Hrönn Magnúsdóttir ÍR sæmdar Afreksmerki KLÍ en þær unnu til bronsverðlauna í liðakeppni á HM öldunga 65+ á liðnu tímabili. Einnig fengu þeir félagar Ásgeri Karl Gústafsson KFR og Tristan Máni Nínuson Afreksmerki KLÍ fyrir að hafa náð brons verðlaunum í tvímenningi á EM U18 nú í vor.

Auk þess vann Guðný Gunnarsdóttir bronsverðlaun á fyrsta Evrópumóti 65 ára og eldri í einstaklingskeppninni í febrúar s.l.

 

 

 

 

Auk þess sæmdi Keilusambandið hjónin Laufey Sigurðardóttur og Bjarka Sigurðsson Silfurmerki KLÍ fyrir ómetanleg störf þeirra í þágu fatlaðra keilara en þau stýra starfi Asparinnar í keilunni.

Fyrir þing lá að ræða um Stefnumótunarvinnu sem stjórn sambandsins vill fara í, var samþykkt af þingi að stjórn sambandsins héldi þeirri vinnu áfram. Einnig var tillaga um breytingar á keppnisdagskrá þess eðlis að dreifa meira úr Íslandsmótum sem sambandið heldur á hverju keppnistímabili. Var henni vísað til Mótanefndar. Loks var Afreksstefna sambandsins samþykkt með tillögu um skoðun varðandi meðaltals viðmið hennar.

Kosningar til stjórnarsetu

Ýmsar spurningar komu fram undir liðnum önnur mál en að þeim loknum var gengið til kosninga. Fyrir lág að kjósa þyrfti um tvo aðalmenn til tveggja ára sem og þrjá varamenn til eins árs skv. lögum.

Fram komu þrjú framboð til aðalmanna og þurfti því að kjósa. Fór það svo að Hafdís Pála Jónasdóttir úr KFR og Sigurður Jónas Eggertsson úr Ösp voru kjörin til stjórnarsetu.

Helga Hákonardóttir Ösp, Böðvar Már Böðvarsson ÍR og Katrín Fjóla Bragadóttir KFR voru síðan kjörin í þessari röð sem varamenn.

Í lokaávarpi þings sagði Valgerður Rún að félög gætu óhikað gengið til skráninga á komandi keppnistímabili þó óvisst er um hvernig dagkrá mun líta út. Hét hún því að stjórn KLÍ muni hverfa frá ákvæðum reglugerða kjósi lið á endanum að draga sig frá keppni samræmist dagkrá ekki þörfum þeirra.

Þingi var slitið laust fyrir kl. 16

Höganäs kvenna og karla upp í Elitserien

Jóhann Ágúst Jóhannsson
Árangur keilara, Erlendar fréttir

Íslendingafélagið Höganäs BC tryggði sér um helgina sæti í efstu deild karla- og kvenna í Svíþjóð í fyrsta sinn í sögu félagsins en margir Íslendingar spiluðu með liðunum.

Karlaliðið hóf helgina á undanúrslitaviðureign gegn Falkenberg í Ängelholm. Bæði lið unnu sitthvora viðureignina til að byrja sem þýddi að liðin þurftu að leika odda viðureign upp á það hvort liðið færi í úrslitin á sunnudeginum.

Liðin sýndu ekki sínar bestu hliðar en það var mikið stress og taugar í báðum liðum og jafnt á flestum pörum. Staðan var 5-5 eftir tvo leiki og þegar stutt var eftir af leik þrjú leiddu Falkenberg á þremur af fjórum pörum og voru með heildina líka en þá gerðist eitthvað ótrúlegt. Höganäs ásamt mögnuðum stuðningi náði að snúa leiknum sér í vil og breyta stöðunni úr 1-4 í 5-0 og staðan því orðin 10-5 og ljóst að Höganäs þyrfti bara að vinna eitt par af fjórum í seinasta leiknum. Besti leikmaður Höganäs þessa helgina, Anton Olson ætlaði sér aldrei neitt annað en sigur og hann byrjaði seinasta leikinn á átta fellum í röð og var á endanum lykillinn að sigri liðsins.

Þá komum við að sunnudeginum, nýr dagur, nýr keilusalur og nýr andstæðingur! Tegnér frá Säffle var andstæðingurinn, besta liðið í MellanAllsvenskan sem vann 20 af 22 leikjum sínum í ár en liðin mættust í Kungälv sem er rétt fyrir ofan Gautaborg. Brautirnar í Kungälv virkuðu auðveldari og spilamennskan var töluvert hærri en áfram sama spennan. Fyrir seinasta leikinn í fyrstu viðureigninni var 8-7 fyrir Tegnér en fyrir seinasta ramma seinasta leiksins áttu Höganäs möguleika á því að vinna leikinn en því miður fékk Mattias Möller glennu sem varð til þess að stigið tapaðist og leikurinn endaði því 10-10. Það var því ljóst að sigurliðið í viðureign tvö myndi vinna einvígið og komast upp.

Þar sýndu Höganäs enn og aftur styrk sinn og einfaldlega keyrðu yfir andstæðinginn, staðan var 8-2 eftir tvo leiki og útlitið gott. En oft er erfitt að komast yfir endalínuna þegar stutt er í mark og það reyndist raunin. Tegnér byrjaði leik 3 mjög vel og leiddi framan af á öllum pörum nema einu en jafnt og þétt tókst Höganäs að kroppa niður forskot Tegnér og þeir fóru að gera mistök. Höganäs tókst að snúa heildinni sér í vil og tryggja sér sigurinn á einu parinu snemma og þegar uppi var staðið þurfti Guðlaugur Valgeirsson að feykja sjöunni til að loka leiknum, sem og hann gerði! 11-4 sigur staðreynd og Höganäs er því komið upp í Elitserien í fyrsta sinn! Guðlaugur Valgeirsson, Ísak Birkir Sævarsson og Mikael Aron Vilhelmsson spiluðu allir með Höganäs liðinu, alla leikina um helgina og Skúli Freyr Sigurðsson var þjálfari niðrí gryfju.

Kvennaliðið mætti Sundbybergs í Nässjö á laugardaginn en Olivia Lindén og Alexandra Guðjónsdóttir voru báðar í liðinu. Það var mikið um taugatitring og spennu í liðunum enda mikið undir og erfiðar aðstæður en bæði lið ekki vön að spila í stuttum burði. Mörg brautarpör voru jöfn en Höganäs tókst á endanum að vinna naumlega í fyrstu viðureigninni að stórum hluta þökk sé Alexöndru og brautarfélaga hennar, Maju Andersson en þær unnu stigið sitt í seinasta leiknum með 3 pinnum og viðureignin endaði með 11-9 sigri Höganäs.

Í viðureign númer tvö var svipað upp á teningnum en liðin voru mjög jöfn og margir leikir sem réðust á aðeins 10-20 pinnum. Aftur var það Höganäs sem dró lengsta stráið en þær leiddu 9-6 fyrir seinasta leikinn sem þýddi að Sundbybergs þurfti að vinna öll stigin í seinasta leik. Þrátt fyrir hetjulega baráttu reyndist það of mikið fyrir Sundbybergs og Höganäs vann viðureignina 13-7 og eru því einnig komnar í Elitserien, magnað afrek en kvennaliðið var neðst í division 1 (neðstu deild kvk) fyrir aðeins 7 árum síðan! Alexandra stóð vel fyrir sínu en í fyrri viðureigninni vann hún og liðsfélagi hennar alla 4 leiki sína og í seinni viðureigninni var hún næstbest í liðinu með 771 í 4 leikjum. Olivia átti erfitt uppdráttar skorlega en hún og liðsfélagi hennar Sandra Gustafsson unnu alla fjóra leikina sína í seinni viðureigninni.

Skráning eldri liða fyrir tímabilið 2026-2027

Þórarinn Már Þorbjörnsson
Uncategorized

Eins og reglur kveða á um þarf að endurskrá eldri lið til þátttöku fyrir 15. maí hvert ár. Ábyrgð eftirfylgni er í höndum félaganna að skrá lið sín. Búið er að opna á skráningar, sjá hér.

Breytingar á dagskrá 2026 til 2027

Á næsta tímabili verða breytingar á leiktíma í Keiluhöllinni Egilshöll. Snúa þær að því að Reykjavíkurfélögin fá ekki eins mikið af brautum á mánudögum og þriðjudögum eins og verið hefur. Því er ljóst að deildarkeppni verður leikin, auk mánudags og þriðjudagskvöld, á laugardags- og sunnudagsmorgnum á komandi tímabili. Félög og lið er hér með gert viðvart um þá breytingu.

Reynt verður eins og kostur er að dreifa því milli deilda hvernig dagskrá raðast niður á deildir og leikdaga. Hve mikið mun flæða á helgar ræðst því eðlilega af því hver endanlegur fjöldi liða verður í deildarkeppninni á komandi tímabili.

ÍR-PLS og ÍR-TT eru Íslandsmeistarar liða 2026

Jóhann Ágúst Jóhannsson
Árangur keilara, Íslandsmót liða

Í kvöld lauk úrslitakeppni 1. deilda karla og kvenna þetta keppnistímabilið. Það voru ÍR liðin PLS og TT sem tryggðu sér Íslandsmeistaratitilinn í ár. ÍR-PLS lagði lið ÍR-L með 23 stigum gegn 9 og ÍR-TT lagði við KFR-Valkyrjur með 23 stigum gegn 13. Alls þarf að vinna meirihluta stiga eða hærra skor úr þrem viðureignum en í þeim eru 42 stig í pottinum.

Þetta er alls 13 Íslandsmeistaratitill ÍR-PLS liðsins og sá sjötti hjá ÍR-TT liðinu.

Í 3. sæti hjá deildarliðum karla voru það lið ÍA og KFR-Lærlingar sem komust í úrslitakeppnina en í 1. deild kvenna fara bara tvö lið í úrslitakeppni og í þriðja sæti varð því lið ÍR-Elding.

Sjá má stöður úr keppninni hér:

Streymt var frá úrslitaviðureignum og má sjá útsendingar hér á YouTube rás KLÍ.

ÍR-PLS og ÍR-L í verðlaunaafhendingu

ÍR-TT og KFR-Valkyrjur í verðlaunaafhendingu

Íslandsmeistarar liða 2026 – ÍR-TT og ÍR-PLS

Nýr valkostur: 10 skipta kort í Keiluhöllinni

Valgerður Rún Benediktsdóttir
Auglýsingar

Keiluhöllin Egilshöll hefur nú tekið í notkun nýjan valkost fyrir keilara og býður til sölu 10 skipta kort í keilu sem kostar 15.900 kr.

Nýjungin kemur í kjölfar viðræðna Keilusambandsins og Keiluhallarinnar en markmiðið er að mæta betur þörfum ólíkra iðkenda enda hentar árskort ekki öllum. Skiptakort getur hentað til dæmis þeim sem hafa ekki tækifærti á að æfa oft, eru að stíga sín fyrstu skref í keilu eða vilja hafa meiri sveigjanleika. Með 10 skipta kortinu fá keilarar hagkvæman kost til að nýta sér aðstöðuna í Keiluhöllinni án þess að skuldbinda sig til lengri tíma.

Keilusambandið fagnar framtakinu og telur að þessi nýi valkostur geti stuðlað að aukinni þátttöku í íþróttinni og gert fleirum kleift að stunda keilu með reglubundnum hætti.

Kortin fást í afgreiðslu Keiluhallarinnar og hægt er að panta braut með því að hringja í Keiluhöllina (511-5300) eða með því að senda tölvupóst á [email protected] Frá september til maí er hægt að nýta kortin á sama tíma og árskort en júní til ágúst er engin takmörkun hvað varðar tíma. 

Af undanúrslitum og umspilum í deild

Jóhann Ágúst Jóhannsson
Íslandsmót liða

Í gær lauk undanúrslitum og fyrri umspils umferðinni fyrir karladeildir sem og umspili fyrir sæti í 1. deild kvenna. Ljóst er því hvaða lið leika um Íslandsmeistaratitil deildarliða í 1. deild karla, hvaða lið komst upp í 1. deild kvenna og hvaða lið hald áfram í umspili um sæti í karladeildunum.

Umspil um sæti í 1. deild kvenna

Hér áttust við lið ÍR-Píurnar sem enduðu í næst neðsta sæti 1. deildar kvenna og ÍR-Meyjur sem enduðu í 2. sæti 2. deildar.

ÍR-Píurnar áttu fyrst heimaleik sem leikinn var á mánudaginn og endaði sá leikur með sigri þeirra 10,5 gegn 3,5. Þar spiluðu þær Bára Líf 551 og Hannah Corella 510 best á meðan Ágústa Kristín átti bestu seríu Skaga-kvenna 498.

Seinni leikurinn fór fram á Skaganum í gærkvöldi og þá snerust leikar við, ÍA-Meyjur fóru með sigur af hólmi 12 gegn 2 og unnu því umspilið með samtals 15,5 stigum gegn 12,5. Þær leika því í 1. deild á næsta tímabili.

Undanúrslit í 1. deild karla

Hér áttust við efstu fjögur liðin eftir að almennri deildarkeppni lauk. ÍR-PLS sem varð deildarmeistari mætti KFR-Lærlingum sem urðu í 4. sætinu. ÍA sem varð í 2. sæti mætti síðan ÍR-L sem varð í því þriðja eftir almenna deildarkeppni.

ÍR-PLS vann fyrri viðureignina 13 gegn 1 og ÍR-L sótti sigur upp á Skaga 12 gegn 2.

Í seinni viðureigninni náðu KFR-Lærlingar aðeins að klóra í bakkann og sigruðu með 8 stigum gegn 4 en það nægði þeim ekki og því ÍR-PLS komið í úrslit með alls 15 stig gegn 9. ÍR-L hélt uppteknum hætti og lagði ÍA í Egilshöllinni aftur með 12 stigum gegn 2 og því alls 24 stig gegn 4.

Það verða því ÍR liðin ÍR-PLS og ÍR-L sem leika um Íslandsmeistaratitilinn í næstu viku. Á sama tíma fer fram úrslitaviðureign í 1. deild kvenna þar sem KFR-Valkyrjur og ÍR-TT eigast við.

Umspil um sæti í 1. deild karla

Þar sem fækkað er í 1. og 2. deild karla á næsta tímabili fer umspils-kapallinn í gang. Í fyrstu umferðinni áttust við ÍR-Land sem varð í næst neðsta sæti 1. deildar við ÍR-Öðlinga sem urðu í 2. sæti í 2. deild.

Fyrri viðureign fór þannig að ÍR-Land hafði sigur 9 stig gegn 5 og því þurftu Öðlingarnir að bíta í skjaldarendur í seinni leiknum. Sem og þeir gerði því þeir unnu þá viðureign 10 stig gegn 4 og því viðureignina samtals 15 stig gegn 13. ÍR-Land spilar því í 2. deild á næsta tímabili en ÍR-Öðlingar eiga næstu viðureign við KFR-Grænu töffarana sem urðu í 9. sæti 1. deildar í ár.

Umspil um sæti í 2. deild karla

Líkt og með umspil í 1. deild karla er líka umspil um sæti í 2. deildinni. Í fyrstu umferð áttust við lið ÍA-C sem varð í næst neðsta sæti deildarinnar og ÍR-Splitturnar þrjár sem urðu í 2. sæti 3. deildar.

Fyrri leikurinn er búinn sem fram fór á mánudaginn en seinni leikurinn er í kvöld upp á Skaga þar sem ekki er hægt að koma tveim leikjum fyrir á sama tíma þar og stúlkurnar voru að klára sinn leik í gær.

ÍR-Splitturnar þrjár unnu fyrri leikinn með 10 stigum gegn 4 en þær þurfa 4,5 stig í viðbót til að halda áfram í umspilinu, annars fer lið ÍA-C í næstu umferð sem verður á móti liði ÍR-Blikk.

Það er því enn ekki ljóst hverjir kljást í þeirri viðureign og spennan töluverð.

Úrslitakeppni Íslandsmeirarar 1. deildar – Breytt dagskrá

Af óviðráðanlegum orsökum þarf að hliðra til áður auglýstri dagskrá úrslita 1. deildar karla og kvenna sem og síðari umferð umspilsviðureigna.

Leikið verður eins og hér segir:

  • sunnudaginn 26.04. kl. 19:00 – 1. umferð úrslita og seinna umspil
  • mánudaginn 27.04. kl. 19:00 – 2. umferð úrslita og seinna umspil
  • miðvikudaginn 29.04. kl. 19:00 – 3. umferð úrslita

 

Íslendingar gera það gott á Seniors Tripple Crown 2026

Jóhann Ágúst Jóhannsson
Árangur keilara
,

Nú um helgina fór fram Öldungamót 50+  Senior Tripple Crown en keppt var í Bromborough Bowl keilusalnum rétt við Liverpool. Mótið að þessu sinni haldið af velska keilusambandinu og áttu auk heimamanna lið Englands, Skotlands, Írlands og Íslands fulltrúa í keppninni.

Ísland sendi alls 12 keppendur út eða 6 í karla- og 6 í kvennaflokki auk þess sem Guðmundur Sigurðsson ÍA fór sem þjálfari hópsins.

Gull og brons í parakeppni

Þau Freyr Bragason KFR og Linda Hrönn Magnúsdóttir ÍR gerðu sér lítið fyrir og unnu til gullverðlauna í parakeppninni. Ekki nóg með það þá náðu hjónin Þórarinn Már Þorbjörnsson og Bára Ágústsdóttir bronsverðlaunum í þeirri keppni. Glæsilegur árangur þar.

Brons í einstaklingskeppni karla

Freyr Bragason átti heilt yfir nokkuð gott mót og auk gullverðlauna í parakeppninni náði hann þriðja sætinu í einstaklingskeppni karla en hann vann þá keppni reyndar í fyrra svo hann er kominn í góða áskrift með verðlaun í þeirri keppni. Linda Hrönn náði 4. sæti í einstaklingskeppni kvenna.

Sjá má myndir og ýmsar stöður úr mótinu á Fésbókarsíðu velska sambandsins

Frétt um landsliðshópinn og ferðina út.

Ísak Birkir með sigur á Hammer Youth Tour

Jóhann Ágúst Jóhannsson
Árangur keilara, Önnur erlend einstaklingsmót

Nú um helgina fór fram seinasta mótið á Hammer Youth Tour sem samanstendur af fjórum mótum sem fram fara í Svíþjóð og Danmörku. Keppt er í fjórum flokkum, 14 ára og yngri, 15-18 ára stelpur, 15-18 ára strákar og 19-25 ára.

Seinasta stoppið á túrnum fór fram í Nässjö í Svíþjóð en það er einmitt heimavöllur sænsku meistaranna í Team Clan og þar má einnig finna keiluskólann þar sem margir efnilegustu og bestu unglingar Svíþjóðar stunda nám og æfa keilu meðfram náminu.

Það var því ljóst að samkeppnin yrði hörð en Ísak Birkir Sævarsson var mættur í elsta flokkinn á meðan Svavar Steinn Guðjónsson tók þátt í flokki 15-18 ára stráka og Alexandra Erla Guðjónsdóttir var meðal keppenda í 14 ára og yngri.

Alexandra komst því miður ekki áfram en hún endaði í 13.sæti eftir forkeppni en efstu 12 í öllum flokkum komust áfram.

Svavar Steinn var í sterkasta flokknum og tókst að komast áfram með persónulegu meti í 6 leikjum, 1391 og var síðastur áfram en meðal annars voru allir strákarnir úr sænska unglingalandsliðinu í úrslitunum ásamt þremur úr danska liðinu sem vann flest gullverðlaunin á EM á dögunum.

Ísak Birkir sýndi enga glansspilamennsku í forkeppninni en gerði nóg og endaði í 9.sæti í forkeppninni með 1282.

Fyrirkomulagið á úrslitadaginn var á þann veginn að þeir 12 sem komust áfram var splittað í tvo hópa og spilaðir voru 3 leikir og eftir það féllu tveir lægstu út.

Því miður reyndist það raunin fyrir Svavar Stein sem átti erfitt uppdráttar í sínum riðli og spilaði 578 í þremur leikjum en endaði þó aðeins 24 pinnum á eftir fjórða sætinu. Samt sem áður frábær árangur hjá Svavari sem var langyngstur í úrslitunum.

Ísak Birkir fór hinsvegar vel af stað og setti tóninn í fyrsta leik með 259, hann fylgdi því eftir með 223 og 233 og var annar eftir þrjá leiki. Eftir það spiluðu þeir fjórir sem eftir voru annan leik þar sem lægsti féll út. Ísak bætti við 239 í leik 4 og var áfram í öðru sæti. Þá bættist við einn leikur í viðbót þar sem aftur lægsti datt út. Ísak spilaði 210 í fimmta og endaði með 1164 í fimm leikjum og komst þar með áfram í fjögurra manna úrslit.

Þar spiluðu tveir efstu úr báðum riðlum saman og byrjuðu á núlli. Í úrslitunum voru þeir Ísak Birkir og liðsfélagi hans og íslandsvinur, Jonathan Johansson ásamt þeim Robin Ilhammar, nýkrýndur sænskur meistari og Evrópumeistari frá seinasta EM og liðsfélagi hans og fastamaður í Team Clan, Alexander Tigerstrand. Alexander og Robin báðir á heimavelli.

Fyrirkomulagið í fjögurra manna úrslitunum var svipað, einn leikur og lægsta skorið er úr leik, þrír áfram sem spila aftur með skorið með sér og aftur lægsta skorið út. Tveir eftir og einn leikur enn og hærra total eftir þrjá er sigurvegarinn.

Eftir fyrsta leik datt Ilhammar óvænt út með 223, Jonathan 228, Ísak 254 og Alexander 267.

Eftir það datt allt spil niður hjá Alexander sem spilaði 171 í leik 2 (samtals 438) á meðan Ísak spilaði 219 (473) og Jonathan 236 (464).

Það voru því Höganäs BC strákarnir sem spiluðu uppá sigurinn og þar reyndist Ísak sterkari, hann endaði á 204 leik og samtals 677 á meðan Jonathan henti í 178 og samtals 642.

Frábær úrslitadagur hjá Ísaki og góð fyrirheit en framundan hjá honum er umspil um sæti í efstu deild með liði sínu, Höganäs BC sem fram fer fyrstu helgina í maí.

Mynd frá Hammer Youth Tour

Umspilsleikir og úrslitakeppnin fram undan

Jóhann Ágúst Jóhannsson
Íslandsmót liða

Nú þegar deildarkeppninni er lokið og úrslit eru ljós er komið að umspilsleikjum sem og úrslitakeppni í 1. deild karla og kvenna. Eins og búið var að tilkynna í upphafi tímabils verður fækkað til baka í 10 liða deildir í 1. og 2. deild karla sem kallar á breytingu á því hvernig lið færast milli deilda. Málið var kynnt s.l. ágúst í frétt sem sjá má hér.

Umspil um sæti í 1. deild karla

Nú kom það í hlut KR-A að falla beint niður í 2. deild. Í næst neðsta sæti varð lið ÍR-Land og eiga þeir því fyrri umspilsleikinn á móti ÍR-Öðlingar sem urðu í 2. sæti í 2. deild. Sú viðureign fer fram mánudaginn 20. og þriðjudaginn 21. apríl. Sigurvegari þeirra viðureignar keppir síðan við KFR-Grænu töffarana 27. og 28. apríl. Sigurvegari þeirrar viðureignar fær særi í 1. deild næsta tímabil.

Umspil um sæti í 1. deild kvenna

Samkvæmt reglugerðinni um deildarkeppni kvenna skal næst neðsta lið úr 1. deild spila umspil við 2. sætið úr 2. deild og að þessu sinni eru það ÍR-Píurnar úr 1. deildinni sem keppa við ÍA-Meyjur. fer sú viðureign einnig fram 20. og 21. apríl. Fyrri leikurinn fer fram í Keiluhöllinni Egilshöll en sá seinni upp á Skaga.

Umspil um sæti í 2. deild karla

Það kom í hlut Þór-Víkingar að falla niður í 3. deild. Í næst neðsta sæti varð lið ÍA-C sem leikur þá við 2. sætið úr 3. deildinni sem varð ÍR-Spilitturnar þrjár. Sú viðureign fer sömuleiðis fram dagana 20. og 21. apríl. Sigurvegari þeirrar viðureignar á síðan umspilsleiki við ÍR-Blikk.

Undanúrslit 1. deildar karla

Sömu daga fara fram undanúrslit 1. deildar karla fram en þá keppa deildarmeistararnir ÍR-PLS við KFR-Lærlinga annars vegar og hins vegar ÍA og ÍR-L en sá leikur fer fram upp á skaga.

 

Þessir leikir fara fram eins og áður segir mánudaginn 20. apríl og þriðjudaginn 21. apríl.

Seinni umspilsleikir sem og úrslitaleikir í 1. deild karla og kvenna fara fram 27. til 29. apríl, sjá dagskrá.

Lokahóf KLÍ 2026

Valgerður Rún Benediktsdóttir
Árangur keilara, Íslandsmót liða, Úrslit

Laugardaginn 18. apríl voru leiknir síðustu leikirnir í deildarkeppni tímabilsins 2025 – 2026. Þá á eftir að spila til úrslita í efstu deildum karla og kvenna og umspil milli deilda en nánar verður fjallað um þá spennandi keppni síðar.

Samkvæmt venju fór lokahóf KLÍ fram að lokinni deildarkeppni og var það kvennalandslið Íslands sem sá um hófið að þessu sinni sem var einkar glæsilegt og vel heppnað. 

Þá fór fram verðlaunaafhending fyrir hin ýmsu afrek í deildarkeppni tímabilsins og voru þau eftirfarandi:

 

Verðlaun í 3. deild karla

Deildarmeistarar: ÍR-keila.is

2. sæti: ÍR-Splitturnar þrjár

3. sæti: ÍR-NAS

  • Hæsti leikur: Ástþór Ragnar Gautason (ÍR-Splitturnar Þrjár) 253
  • Hæsta sería: Bharat Singh (ÍR-T) 642
  • Hæsta meðaltal: Bharat Singh (ÍR-T) 178,73
  • Fellukóngur: Bharat Singh (ÍR-T) 3,95
  • Stigameistari: Baldur Einarsson (ÍR-Splitturnar Þrjár) 0,90
  • Mestu framfarir: Haukur Guðmundsson (Ösp-Ásar)
  • Stjörnuskjöldur: ÍR-Splitturnar Þrjár 183 Stjörnur
  • Hæsti leikur liðs: ÍR-Splitturnar Þrjár 643
  • Hæsta sería liðs: ÍR-Splitturnar Þrjár 1676
  • Hæsta meðaltal liðs: ÍR-Splitturnar Þrjár 162,73

 

Verðlaun í 2. deild kvenna

Deildarmeistarar: KFR-Afturgöngur

2. sæti: ÍA-Meyjur

3. sæti: ÍR-Skvísur

  • Hæsti leikur: Margrét Björg Jónsdóttir (ÍR-Skvísur) 235
  • Hæsti leikur: Viktoría Hrund Klörudóttir (ÍR-Skvísur) 235
  • Hæsta sería: Margrét Björg Jónsdóttir (ÍR-Skvísur) 595
  • Hæsta meðaltal: Margrét Björg Jónsdóttir (ÍR-Skvísur) 172,56
  • Felludrottning: Margrét Björg Jónsdóttir (ÍR-Skvísur) 3,24
  • Stigameistari: Margrét Björg Jónsdóttir (ÍR-Skvísur) 0,84
  • Mestu framfarir: Jóhanna Þóra Guðbjörnsdóttir (ÍR-KK)
  • Stjörnuskjöldur: KFR-Afturgöngurnar 138 Stjörnur
  • Hæsti leikur liðs: ÍR-Skvísu 612
  • Hæsta sería liðs: ÍR-Skvísur 1643
  • Hæsta meðaltal liðs: KFR-Afturgöngurnar 154,57

 

Verðlaun í 2. deild karla:

Deildarmeistarar: ÍR-Naddóður

2. sæti: ÍR-Öðlingar

3. sæti: ÍA-W

  • Hæsti leikur: Tómas Freyr Garðarsson (ÍA-B) 300
  • Hæsta sería: Skúli Freyr Sigurðsson (ÍR-LB) 714 
  • Hæsta meðaltal: Skúli Freyr Sigurðsson (ÍR-LB) 216,85
  • Fellukóngur: Skúli Freyr Sigurðsson (ÍR-LB) 6,69
  • Stigameistari: Skúli Freyr Sigurðsson (ÍR-LB) 0,9
  • Mestu framfarir: Snæbjörn B. Þormóðsson (ÍR-Geirfuglar)
  • Stjörnuskjöldur: ÍR-Naddóður 269
  • Hæsti leikur liðs: ÍR-Naddóður 696
  • Hæsta sería liðs: ÍR-LB 1.912
  • Hæsta meðaltal liðs: ÍR-Naddóður 183,06

 

Verðlaun í 1. deild kvenna:

KFR-Valkyrjur enduðu í fyrsta sæti eftir deildarkeppni og keppa til úrslita um Íslandsmeistaratitilinn við ÍR-TT sem enduðu í öðru sæti.

3. sæti: ÍR-Elding

  • Hæsti leikur: Linda hrönn Magnúsdóttir (ÍR-TT) 258
  • Hæsta sería: Alexandra Kristjánsdóttir (ÍR-VÁ) 663
  • Hæsta meðaltal: Marika Katarina E. Lönnroth (KFR-Valkyrjur) 183,29
  • Felludrottning: Marika Katarina E. Lönnroth (KFR-Valkyrjur) 4,38
  • Stigameistari: Marika Katarina E. Lönnroth (KFR-Valkyrjur) 0,75
  • Mestu framfarir: Bára Líf Gunnarsdóttir (ÍR-Píurnar)
  • Stjörnuskjöldur: ÍR-TT 268
  • Hæsti leikur liðs: KFR-Valkyrjur 651
  • Hæsta sería liðs: ÍR-TT 1.737
  • Hæsta meðaltal liðs: KFR Valkyrjur 177,31

 

Verðlaun í 1. deild karla:

Í fyrstu deild karla spila fjögur efstu liðin til úrslita um Íslandsmeistaratitilinn. Eftir deildarkeppni var staðan þannig að ÍR-PLS var í fyrsta sæti, ÍA í öðru sæti, ÍR-L í því þriðja og KFR-Læringar í því fjórða. 

  • Hæsti leikur: Mikael Aron Vilhelmsson (ÍR-PLS) 297
  • Hæsta sería: Ásgeir Karl Gústafsson (KFR-Lærlingar) 763
  • Hæsta meðaltal: Mikael Aron Vilhelmsson (ÍR-PLS) 224,30
  • Fellukóngur: Mikael Aron Vilhelmsson (ÍR-PLS) 6,96
  • Stigameistari: Mikael Aron Vilhelmsson (ÍR-PLS) 0,89
  • Mestu framfarir: Viðar Ingi Ragnarsson (ÍR-Land)
  • Stjörnuskjöldur: ÍR-PLS 387
  • Hæsti leikur liðs: ÍR-PLS 772
  • Hæsta sería liðs: ÍR-PLS 2188
  • Hæsta meðaltal liðs: ÍR-PLS 211,63

KLÍ óskar verðlaunahöfum til hamingju með gott tímabil og þeim liðum sem eiga eftir að spila til úrslita og umspil góðs gengis á næstu dögum.