Um síðustu helgi fór fram 32. þing KLÍ en að þessu sinni var það ÍA sem bauð þingheim velkominn upp á Skaga. Hefðbundin þingstörf fóru fram samkvæmt lögum sambandsins og sem fyrr var Hafsteinn Pálsson, meðstjórnandi í framkvæmdastjórnar ÍSÍ, kjörinn þingforseti. Þetta var í 30. sinn sem Hafsteinn stýrði þingi Keilusambandsins og kann KLÍ honum miklar þakkir fyrir hans aðstoð til sambandsins á ársþingum sem og í öðrum málum.
Fyrir utan hefðbundin þingmál voru nokkur mál lögð fyrir þingið til umræðu svo sem tillögur að breytingu á reglugerðum og er farið nánar út í þær umræður sem sköpuðust í þingskýrslu en gögn þingins má nálgast hér.
Fyrir lá að Jóna Guðrún formaður sambandsins mundi stíga frá borði á þinginu þar sem hún og fjölskylda hennar er að flytja erlendis á komandi vikum. Því þurfti að kjósa nýjan formann sambandsins á þinginu og var Valgerður Rún Benediktsdóttir úr ÍR ein í framboði til og því sjálfkjörin formaður til tveggja ára.
Auk þess lá fyrir að kjósa þurfti einn stjórnamann til eins árs og var Guðmundur Sigurðsson ÍA einn í framboði þar. Samkvæmt lögum þarf að kjósa tvo stjórnarmenn til tveggja ára á hverju þingi og voru þeir Ársæll Erlingsson ÍA og Jóhann Ágúst Jóhannsson ÍR einir í framboði og því sjálfkjörnir. Fyrir í stjórn er síðan Gunnar Þór Ásgeirsson ÍR.
Varamenn í stjórn voru síðan kjörin þau:
- varamaður: Helga Hákonardóttir Ösp
- varamaður: Katrín Fjóla Bragadóttir KFR
- varamaður: Böðvar Már Böðvarsson ÍR
Ársskýrsla, þinggerð og önnur gögn þingsins má nálgast hér.
