Keiludeild ÍR hefur samið við Svíann Robert Anderson, sem er nú meðal bestu keilara í Evrópu í dag, að leiðbeina á námskeiðum í keilu í Keiluhöllinni Öskjuhlíð. Fyrsta námskeið var í haldið vikuna 19. - 23. júní og var almenn ánægja meðal þátttakenda með kennsluna. Robert verður hér næst með námskeið í vikunni 10. - 14. júlí n.k. og hvetjum við keilara til að nýta vel þetta tækifæri til að sækja sér þjálfun fyrir næsta keppistímabil. Verð fyrir hvern tíma (80 mínútur) er aðeins kr 2.000 og komast 8 manns að í einu. Einnig er hægt að fá æfingatíma (80 mínútur) og kostar hver tími þá 1.000 kr. Skráning í tíma fer fram hjá Reyni Þorsteinssyni formanni Keiludeildar ÍR í síma 825 1213. Sjá nánar í auglýsingu.
Þýskaland er land HM mótanna þessi misserin og næsta heimsmeistarmót í keilu, Heimsmeistaramót unglinga verður haldið í Berlín í Þýskalandi dagana 21. - 30 júlí n.k. Undirbúningur fyrir mótið er nú í fullum gangi, en keppendur fyrir Íslands hönd verða þeir Hafþór Harðarson KFR, Magnús S. Guðmundsson KFA og Stefán Claessen ÍR. Þjálfari og fararstjóri er Theódóra Ólafsdóttir. Sjá nánar á heimasíðu mótsins
Í fyrsta skipti taka íslenskir keilarar þátt í Youth friendship games sem að þessu sinni fara fram í Hollandi dagana 28. - 30 júlí n.k. Mótið er ætlað ungmennum á aldrinum 11 - 19 ára og keppendur verða þau Ástrós Pétursdóttir, Bergþóra R. Ólafsdóttir, Hafliði Örn Ólafsson, Jón Kristinn Sigurðsson, Karen Sigurðardóttir og Linda B. Gunnarsdóttir öll úr keiludeild ÍR. Fararstjóri hópsins verður Árni Geir Ómarsson. Þess má geta að keiludeild ÍR fékk úthlutaðar 150.000 kr vegna þessa verkefnis úr Afreks- og styrktarsjóði SPRON og ÍBR í júní, sjá nánar á heimasíðu ÍBR .
Árlegur fundur Norrænu keilusambandanna var haldinn í Lillehammer í Noregi dagana 6. og 7. maí s.l. og sóttu fundinn fyrir hönd KLÍ þau Valgeir Guðbjartsson formaður og Sigríður Klemensdóttir f.v. gjaldkeri. En þessa fundi sækja að jafnaði tveir fulltrúar frá hverju Norðurlandanna. Á fundunum er m.a. rædd staða íþróttagreinarinnar í hverju landi, útbreiðslustarf, sameiginleg baráttumál á alþjóðavettvangi og annað samstarf sambandanna.
Íþróttabandalag Reykjavíkur og SPRON standa sameiginlega að Afreks- og styrktarsjóði og er tilgangur hans að styrkja ungt og efnilegt reykvískt íþróttafólk á aldrinum 15-22 ára sem hefur burði til að verða afreksfólk í íþróttum. Sjóðurinn hjálpar félögunum að vinna metnaðarfullt og faglegt starf með ungu afreksfólki til að þau nái betri árangri. Veitt er úr sjóðnum þrisvar á ári. Við úthlutun úr sjóðnum í júní hlaut Keilufélag Reykjavíkur 80.000 kr. vegna æfingabúða og þátttöku Hafþórs Harðarsonar í ýmsum mótum erlendis og keiludeild ÍR 150.000 kr. vegna þátttöku í Barna vinaleikum í Hollandi Youth Friendship games , sjá nánar á heimasíðu ÍBR
Stórmót ÍR var haldið í keilusalnum Arctic Bowl á Keflavíkurflugvelli sunnudaginn 11. júní s.l. og er þetta að líkindum í síðasta skipti sem farið verður upp á Völl, enda svæðið núna farið að líta út eins og draugaþorp. Alls tóku 27 keppendur þátt í mótinu að þessu sinni og var keppni jöfn og spennandi. Sigurvegari í kvennaflokki var Sigurlaug Jakobsdóttir 1.091 og sigurvegari í karlaflokki var Steinþór G. Jóhannsson 1.275 og hlutu þau að launum ferð á mót á Evróputúrnum. Sigurvegari í gestaflokki var Hafþór Harðarson KFR 1.251. Sigurvegari í kvennaflokki með forgjöf var Þórunn H. Davíðsdóttir 1.238 og í karlaflokki með forgjöf sigraði Davíð Sölvason 1.247. Útdráttarverðlaunin hlaut Linda Hrönn Magnúsdóttir. Sjá nánar um úrslit á heimasíðu keiludeildar ÍR.
Þriðjudaginn 6. júní afhenti Ólafur Rafnsson forseti ÍSÍ þjálfarastyrki Verkefnasjóðs ÍSÍ. Að þessu sinni bárust 28 umsóknir, 21 frá karlmönnum, 6 umsóknir frá konum og 1 frá félagi. Íþróttagreinar umsækjenda voru alls 16. Í dag voru veittir 11 styrkir að upphæð kr. 50.000 hver og 2 styrkir að upphæð kr. 25.000. Heildarúthlutun styrkja er því kr. 600.000,- til 11 íþróttagreina.
Tveir keilarar hlutu styrki að þessu sinni, þeir Arnar Sæbergsson og Steinþór Geirdal Jóhannsson úr ÍR, sem hlutu 25.000 kr. styrk hvor til að sækja framhaldsnámskeið til þjálfunar erlendis. Sjá nánar á heimasíðu ÍSÍ
Taktu Lottó í áskrift og þú gætir unnið borgarferð fyrir tvo með Icelandair, kvöldverð fyrir tvo hjá Humarhúsinu eða árskort í líkamsrækt hjá World Class. Skelltu þér á miða á www.lotto.is
Keiludeild ÍR stendur fyrir Stórmóti ÍR í keilusalnum Arctic Bowl sunnudaginn 11. júní n.k. og verður það sennilega síðasta tækifæri keilara til að spila í salnum áður en Varnarliðið yfirgefur landið. Sjá nánar í auglýsingu
